ලංකා ප්‍රිමියර් ලීග් විස්සයි 20 ක්‍රිකට් තරගාවලියේ මංගල ක්‍රීඩක වෙන්දේසිය අද (14) කොළඹ ෂැංග්‍රිලා හෝටලයේදී පැවැත්වීමට නියමිතය.
මෙතෙක් මේ තරගාවලිය ක්‍රීඩක කෙටුම්පත් කිරීමේ (Player Draft) ක්‍රමවේදය හරහා සිදු වූ අතර, මෙවර ක්‍රීඩකයන් තෝරා ගැනීම ක්‍රීඩක වෙන්දේසියක් හරහා සිදු කිරීම විශේෂත්වයකි.
වෙන්දේසියක් තුලින් ක්‍රීඩකයන් තෝරා ගන්නා තෙවැනි ලීගය ලංකා ප්‍රිමියර් ලීග් තරගාවලිය වන අතර දෙවැනි ලීගය වන්නේ
දකුණු අප්‍රිකානු ප්‍රිමියර් ලීග් තරගාවලියයි.
ඔවුන් පසුගිය 2022 වසරේ සිට වෙන්දේසියක් හරහා ක්‍රීඩකයින් තෝරා ගනීමට සිදු කිරීමට කටයුතු කළේය.
පළමු වරට ක්‍රීඩක වෙන්දේසියකින් ක්‍රීඩකයන් තෝරා ගැනීම සිදුකළේ ඉන්දීය ප්‍රීමියර් ලීගය සඳහායි.
විදේශීය ක්‍රීඩකයන් 156ක් ලියාපදිංචි වී සිටින අතර, දේශීය ක්‍රීඩකයන් 204ක් ද ක්‍රීඩක ලැයිස්තුවට ඇතුළත්ව සිටිති.
ඒ අනුව ක්‍රීඩකයන් 360ක් කාණ්ඩ දෙකකට වර්ග කොට ඇති අතර, අදාල රටවල ජාතික කණ්ඩායම් නියෝජනය කළ හා පළමු පෙළ ක්‍රිකට් ක්‍රීඩා කර ඇති ක්‍රීඩකයන් ඒ අතර වේ.
මෙවර තරගාවලියේදී තරග වදින කණ්ඩායම් සඳහා, විදේශීය ක්‍රීඩකයන් 6ක් ඇතුළත් කර ගත යුතුව ඇත.
වෙන්දේසිය පස්වරු 3ට ආරම්භ කෙරෙන අතර, වෙන්දේසිය වට 51කින් සමන්විත වේ.
ජැෆ්නා කිංග්ස්, ගෝල් ග්ලැඩියේටර්ස්, දඹුල්ල අවුරා, කැන්ඩි ෆෝල්කන්ස් සහ කලම්බු ස්ට්‍රයිකර්ස් ලෙස මෙවරද කණ්ඩායම් 5ක් තරග වදියි.
පසුගිය වසරේදී Colombo Stars ලෙස තරග කල කණ්ඩායමේ හිමිකාරීත්වය වෙනස් වී එය Colombo Strikers ලෙස මෙවර තරගාවලියට එක්වෙයි.