බ්‍රිතාන්‍ය පාර්ලිමේන්තුවේ පසුපෙළ ව්‍යාපාරික කමිටුව විසින් පසුගිය දා ඉල්ලා සිටි පරිදි ශ්‍රී ලංකාවේ මානව හිමිකම් සහ ආර්ථික තත්ත්වය පිළිබඳව එක්සත් රාජධානියේ මහජන මන්ත්‍රී මණ්ඩලය පසුගිය බදාදා(09) විවාදයක් පවත්වන ලදී.
මෙම සාකච්ඡාවේ අරමුණු වුයේ, ශ්‍රී ලංකාවේ මානව හිමිකම් සහ ආර්ථික තත්ත්වය සම්බන්ධයෙන් එක්සත් රාජධානියේ ප්‍රතිචාරය මෙන්ම පවතින ආර්ථික අර්බුදය මධ්‍යයේ ශ්‍රී ලංකාවට එක්සත් රාජධානියේ ආධාර ලබා දීමේ ක්‍රියාවලිය සිදු වන අකාරය සොයා බැලීමයි.
ශ්‍රී ලංකාවේ වත්මන් ආර්ථික අර්බුදයට හේතු පාලකයන්ගේ භයානක හා දිගුකාලීන වැරදි කළමනාකරණයත්, 2019 වසරේ සිදු වූ බිහිසුණු පාස්කු ප්‍රහාරයත්, කොවිඩ් වසංගතය සහ රුසියාවේ යුක්‍රේන ආක්‍රමණය නිසා ඇති වූ ආර්ථික ප්‍රතිවිපාක බව බ්‍රිතාන්‍ය පාර්ලිමේන්තු උප ලේකම් පාර්ලිමේන්තු මන්ත්‍රී ලියෝ ඩොචර්ටි මෙහිදී කියා සිටියේ.
එසේම ඔහු පැවසුවේ ශ්‍රී ලංකාවේ දීර්ඝ කාලීන ආර්ථික ප්‍රකෘතිය සහ වර්ධනය සඳහා ස්ථාවර දේශපාලන විසඳුමක් අත්‍යවශ්‍ය බව බ්‍රිතාන්‍ය රජය විශ්වාස කරන බවයි.
මානව හිමිකම් සහ වගවීම සම්බන්ධයෙන් ප්‍රගතියක් අත්කර ගන්නා ලෙස බ්‍රිතාන්‍ය රජය ශ්‍රී ලංකාවෙන් දිගටම ඉල්ලා සිටින බව ද ඔහු එහි දී සඳහන් කළා.
අදාල විවාදය අවසන් කරමින් කොන්සර්වේටිව් පාර්ලිමේන්තු මන්ත්‍රී එලියට් කොල්බර්න් බ්‍රිතාන්‍ය රජයෙන් ඉල්ලා ඇත්තේ ශ්‍රී ලංකාවේ මානව හිමිකම් ප්‍රවර්ධනය කිරීම සඳහා වන තමන්ගේ උත්සාහය සම්බන්ධයෙන් නැවත සලකා බලන ලෙසය.