විනාශ වූ චැලෙන්ජර් ෂටලයේ ලොකු කැබැල්ලක් රූපවාහිනී කණ්ඩායමකට හමුවෙයි.

” History ” රූපවාහිනී චැනලය මගින් ලබන නොවැම්බර් 22 වෙනි දින සිට විකාශනය කිරීමට නියමිතව ඇති ” The Bermuda Triangle : Into Cursed Waters ” නම් කථාංග හයකින් සමන්විත රූපවාහිනී වාර්තා චිත්‍රපටයක නිෂ්පාදන කණ්ඩායමට සමුදුරු පතුලේ තිබූ චැලෙන්ජර් අභ්‍යවකාශ ෂටලයේ ලොකු කැබැල්ලක් හමු වී තිබෙනව.

අඟල් 8ක ( සෙන්ටි මීටර් 20 ) දිග පළල ඇති හරි හතරැස් තාප පරිවාරක උළු ආවරණයකින් සමන්විත අඩි 15 × 15 ( මීටර් 4.5 × 4.5 ) විශාලත්වයක් සහිත මෙම සුන්බුන් කැබැල්ල වසර 25කට වඩා වැඩි කාලයක් ඇතුළත චැලෙන්ජර් ෂටලයෙන් හමු වුණු පළමු ප්‍රධානතම සොයාගැනීම වෙනව.

මෙය හමු වී තිබෙන්නෙ බර්මියුඩා ත්‍රිකෝණයට වයඹ දෙසින් ෆ්ලොරිඩා හි අභ්‍යවකාශ මධ්‍යස්ථාන වෙරළට නුදුරු සාගර පතුලෙනුයි.

” History ” රූපවාහිනී චැනලයේ අරමුණ වූයේ චැලෙන්ජර් ෂටලයේ සුන්බුන් සෙවීම නොව ෆ්ලොරිඩා හි කැනවරල් තුඩුවට ඔබ්බෙන් මුහුදු පතුලේ ඇති ගුවන් යානා සුන්බුන් සෙවීමයි.

එහි කිමිදුම්කරුවන්ගේ අවධානය යොමුව තිබුණේ 1945 වසරේ දෙසැම්බර් මස 5 වෙනි දින කිසිදු සළකුණක් ඉතිරි නොකර අතුරුදන් වුණු PBM Martin Mariner නම් ගුවන් යානයේ සුන්බුන් සෙවීමටයි.

දෙවෙනි ලෝක යුද සමයේ ගුවන් යානයකට වඩා නවීන ගුවන් යානා ව්‍යුහයක පෙනුම ඇති මෙම කැබැල්ල පළමු වරට මෙම වසරේ මාර්තු මාසයේදී හමු වූ පසු නැවත මැයි මාසයේදී දෙවෙනි වරට සිදු කළ කිමිදීමකින් ඒ පිළිබඳ තොරතුරු NASA අභ්‍යවකාශගාමියෙකු වන බෲස් මෙල්නික් වෙත ඉදිරිපත් කළ විට ඔහු එය චැලෙන්ජර් ෂටලයේ කැබැල්ලක් විය හැකි බවට සැක කරනු ලැබුවා.

අනතුරුව චිත්‍රපටයේ නිෂ්පාදකයන් විසින් පසුගිය අගෝස්තු මාසයේදී මේ පිළිබඳව NASA ආයතනයේ අවධානයට ලක් කිරීමෙන් පසුව එහි ඇපලෝ , චැලෙන්ජර් සහ කොලොම්බියා Lessons Learned Program වැඩ සටහනේ ව්‍යාපෘති කළමනාකරු වන මයික් සියානෙල්ලි විසින් එම කැබැල්ල චැලෙන්ජර් ෂටලයේ කොටසක් බවට ස්‍ථිර කරනු ලැබුවා.
එහි කොපමණ ප්‍රමාණයක් මුහුදු පතුලේ වැලි යට සැඟව ඇතිදැයි නොදන්නා බැවින් එහි සැබෑ විශාලත්වය නිශ්චය කිරීම අපහසු බව ඔහු මේ පිළිබඳව නිකුත් කළ වීඩියෝ ප්‍රකාශයක සඳහන් කරනවා.
“අපි මේ පිළිබඳව මුලින්ම කළ එක දෙයක් වූයේ මේ සොයා ගැනීම ගැන චැලෙන්ජර් ෂටලයේ අභ්‍යවකාශගාමීන් සියල්ලගේම පවුල් වෙත දැනුම් දීමයි.” මයික් සියානෙල්ලි සඳහන් කරනවා.

ඊයේ නොවැම්බර් 10 වෙනි දින මේ පිළිබඳව NASA ආයතනය මගින් නිකුත් කරන ලද නිවේදනයක එම ආයතනයේ ප්‍රධානි, බිල් නෙල්සන් මෙසේ සඳහන් කරනවා.

“චැලෙන්ජර් ෂටලයේ සිටි ඒ නිර්භීත ගවේෂකයන් සත් දෙනාගේ ජීවිත අහිමිව ගොස් වසර 37කට ආසන්න කාලයක් ගත වුණත්, මෙම විනාශය පිළිබඳ අප රටේ සාමූහික මතකය සදාකාලික වේදනාවක් ගෙන දෙනවා.මාත් ඇතුළු ලොව වටා වෙසෙන මිලියන ගණනකට 1986 වසරේ ජනවාරි මස 28 වෙනි දිනය තවමත් දැනෙන්නේ ඊයේ දිනය වගෙයි. “
1986 වසරේ ජනවාරි මස 28 වෙනි දින චැලෙන්ජර් අභ්‍යවකාශ ෂටලය ගුවන්ගත වීමෙන් තත්පර 73කට පසු එය ගිනිගෙන පිපිරී විනාශ වූයේ මිනිස් ජීවිත 7ක් ද සමගයි.

ඔවුන් අතර Francis ” Dick ” Scobee, Mike Smith, Ron McNair, Ellison Onizuka, Judy Resnik, Greg Jarvis සහ අභ්‍යවකාශයට යාමට පෙරුම් පුරා සිටි ලොව ප්‍රථම ගුරු මාතාව වූ Christa McAuliffe ද වූවා.

අනතුර සිදු වී මාස 7ක් වන විට ෂටලය හා එයට සම්බන්ධ කොටස් වල ටොන් 118ක් බැරැති කැබලි 167ක් සොයාගනු ලැබුවා.
ලබන නොවැම්බර් 22 වෙනි දින විකාශනය කෙරෙන ” The Bermuda Triangle : Into Cursed Waters ” රූපවාහිනී වාර්තාමය වැඩ සටහන් මාලාවේ පළමු කථාංගයට මෙම සොයාගැනීම ඇතුළත් කෙරෙන බව ” History ” චැනලයේ ප්‍රධානියෙකු වන Eli Lehrer පවසනවා.

ප්‍රේමශාන්ත කුමාරසිරි : (තරුලොව)