කොළඹ වේයෝ බඳිති
තුන්හුලස් මැටි හුඹස්.
හොවැංහෝ ගඟ බඩින්
පදම් කළ මැටි ගෙනත්.
තුඹස ළඟ ඇතිකරති
ප්රීසියන් කිරි හරක්.
පිරිත් පැන් තොල ගාති
පෙරාගෙන තුන් වරක්.
හාල්මැස්සෝ වඳිති
ඇමරිකන් පිටි නැවක්.
හඳේ ගෑවෙන තරම්
උස ම උස කුඹ ගහක්.
පිටකොටුවෙ බෝධියට
වඳින සිටු දියණියක්
පටාචාරාවගේ
කඳුළු අරගෙන ඇවිත්.
ඇඟිලි නොකපන නිසා
අඟුල්මල් තරුණයෙක්
දැලිපිහිය ගනු පිණිස
අටපිරිකරක් ගෙනත්.
ගාලු මුවදොර හදන
පිරමීඩ පේලියක්.
මමියකට ඉඟිමරන
ඔටුවෙකුගෙ මනදොළක්.
මුල්ගලක අකුරු ටික
උලා කන කොටළුවෙක්.
ගල් පෙරේතයෙක් වූ
සෙල්මුවා වෘෂභයෙක්.
ඇල්වතුර ජපකරන
කල්කටා අසපුවක්.
තොල් සපා සිල් බිඳින
මල්සරා ශ්රමණයෙක්.
ගර්භාෂ කුහරයක
පතරොමක කලලයක්.
පෙකණිවැල සේ වැඩෙන
සරදියෙල් නහරයක්.
කොපුවකට ගතු කියන
ගර්භනී සිහිනයක්.
පොල්කිරෙන් දිය නාන
මහරු ශිව ලිංගයක්.
ගෙන්දගම් පොළොව උඩ
අහස කඩදාසියක්.
පොඩි එකෙක් පැන්සලෙන්
අඳියි හතරැස් හඳක්.
දෙදාස් හතළිස් අටට
හිනාවෙන යමහලක්.
කැලැන්ඩරයට යටින්
ලෝදියක චූ බරක්.
කොළඹ වේයෝ බඳිති
තුන්හුලස් මැටි හුඹස්.
නයිල් මිටියාවතින්
පදම් කළ මැටි ගෙනත්.
කුමාර හෙට්ටිආරච්චි (fb)
තිලක් පුෂ්පකුමාරගේ (ලංකාදීප ඡායාරුපයක්)