සංක්‍රමණිකයන්ට දොරටු විවෘත කරන ලෙස ෆ්‍රැන්සිස් පාප් වහන්සේ හංගේරියාවෙන් ඉල්ලීම් කර ඇතැයි විදෙස් මාධ්‍ය වාර්තා කළේය.
පසුගියදා හංගේරියාවේ සංචාරය කළ ෆ්‍රැන්සිස් පාප් වහන්සේ එරට බුඩාපෙස්ට් අගනුවර පැවැති සිය දේශනයේදී මේ බව පැවසීය.
පාප් වහන්සේ මේ ඉල්ලීම කර ඇත්තේ එරට රජය සංක්‍රමණිකයන්ට හංගේරියාවට ඇතුළුවීම තහනම් කිරීමට ප්‍රතිචාර දක්වමිණි.
වැඩිදුරටත් අදහස් දක්වමින් යුක්රේනයේ රුසියාවේ යුද්ධය අවසන් කරන ලෙස තමන් ආයාචනා කරන බවද උන් වහන්සේ පවසා තිබේ.
විශේෂයෙන්ම පාප් වහන්සේ හංගේරියාවෙන් සහ යුරෝපයෙන්ම ඉල්ලා සිටියේ යුද්ධයෙන්, දරිද්‍රතාවයෙන් සහ දේශගුණික විපර්යාසවලින් පලා යන පිරිස් සාදරයෙන් පිළිගන්නා ලෙසයි.
එමෙන්ම සංක්‍රමණිකයන්ට අවසර නොදීම කණගාටුදායක සහ වේදනාකාරී සිදුවීමක් බව වැඩිදුරටත් අවධාරණය කරන උන්වහන්සේ අගමැතිවරයා ඇතුළු කැබිනට් මණ්ඩලය හංගේරියාවට සංක්‍රමණිකයන් පැමිණීම වැළැක්වීමට කටු කම්බි වැටක් ඉදිකරමින් මාර්ග බාධක යෙදීම ආත්මාර්ථකාමීත්වය පෙන්නුම් කරන්නක් බව ද පවසා ඇත.
මෙම දේශනය සඳහා හංගේරියාවේ අගමැති වික්ටර් ඕබන් ඇතුළු ලක්ෂයකට ආසන්න හංගේරියානු ජනතාව එම හමුවට සහභාගි වී ඇත.