Great Place to Work විසින් මෙරට ප්‍රමුඛ තොරතුරු තාක්ෂණ සමාගමක් වන Fcode Labs (www.fcodelabs.com) ආසියාවේ සේවය කිරීමට සුදුසු හොඳම සේවා ස්ථාන අතරින් එකක් ලෙස ලැයිස්තුගත කර තිබේ.
ඒ අනුව කුඩා සහ මධ්‍ය පරිමාණ ව්‍යාපාර කාණ්ඩයට අයත් සේවය කිරීමට වඩාත් සුදුසු ආසියානු සමාගම් අතර 35 වැනි ස්ථානය එම සමාගමට හිමි වී ඇත. පසුගියදා කොළඹ හිල්ටන් හෝටලයේ පැවති ‘Great Place to Work Awards – 2022’ සම්මාන උළෙලට සහභාගි වූ Fcode Labs කණ්ඩායම වෙත මෙම සහතිකය පිරිනමන ලදි. පාරිභෝගික තෘප්තිය හා සමානව ම කාර්යමණ්ඩලයේ තෘප්තිය ද අගය කරන සමාගම් ගණනාවක් අතරින් ආසියාවේ හොඳම සේවා ස්ථානයක් බවට පත්වීම Fcode Labs ලැබූ ජයග්‍රහණයකි.
ඉහළ වැටුප් ලබන Fcode Labs සේවක-සේවිකාවන් ඔවුන්ට පැවරී ඇති රාජකාරි පිළිබඳව ඉතා තෘප්තිමත් බව අදාළ දත්ත මගින් තහවුරු වේ. අර්බුදකාරී අවස්ථාවක කාර්යමණ්ඩලය ඉටු කරන මෙහෙවර අවතක්සේරු නොකළ යුතු බව සමාගම දැඩි ව විශ්වාස කරයි. ඇමෙරිකා එක්සත් ජනපද ඩොලරයේ අගයට සාපේක්ෂ ව සේවක වැටුප් ගණනය කිරීම සමාගම සේවක වැටුප් ඉහළ මට්ටමක පවත්වා ගැනීම සඳහා ගෙන ඇති වැදගත් පියවරකි.
කොවිඩ්-19 වසංගත තත්ත්වය සමඟ මාර්ගගත ක්‍රමයට රාජකාරි කිරීමට සිදුවීම මෘදුකාංග සමාගම් මුහුණ දුන් විශාල අභියෝගයකි. එය 2022 වසරේ හොඳම සේවා ස්ථාන අතර ලැයිස්තුගත වීමට ද අභියෝගයක් විය. එම අභියෝගය සාර්ථකව බාර ගත් Fcode Labs දෙමුහුන් සේවා ක්‍රමයක් ස්ථාපිත කළේය. එමඟින් එහි සේවකයන්ට නම්‍යශීලී ව සහ පීඩනයකින් තොරව සේවය කිරීමට අවශ්‍ය නිදහස ලැබිණි.
සේවය කිරීමට හොඳම ස්ථානයක් වන Fcode Labs සියලුදෙනාගේ අදහස් සහ යෝජනා පිළිගන්නා විනෝදාත්මක සේවා ස්ථානයක් ද වේ. කාර්යාලයේදී මෙන්ම මාර්ගගත ක්‍රමයට පවත්වන විවිධ වැඩසටහන් හරහා සේවකයන් තුළ උද්යෝගය පවත්වාගෙන යාම ද සුවිශේෂ ලක්ෂණයකි.
ක්‍රීඩා උත්සව සහ විනෝද චාරිකා වැනි දෑ කණ්ඩායම් සම්බන්ධතා සහ සේවක අභිප්‍රේරණය ඉහළ නංවයි. විශිෂ්ට මෘදුකාංග නිෂ්පාදනය Fcode Labs සමාගමක් ලෙස ඉටුකරන කාර්යභාරය අතරින් කොටසක් පමණි. එහි දැකිය හැකි ධනාත්මක වටපිටාව සහ යහපත් වටිනාකම් සේවා ස්ථානයක් ලෙස එය ලබා ඇති දියුණුව මනාව පිළිබිඹු කරයි. අභියෝග රැසක් මධ්‍යයේ මෙතෙක් දුර පැමිණියත් ‘හොඳම දේ ඉදිරියට’ යන්න ඔවුන්ගේ විශ්වාසය වේ.