ජනතා විමුක්ති පෙරමුණ සිය මැයි දින රැළියේදී අනවශ්‍ය ගැටුමක් ඇතිකර ගැනීම සඳහා අවසර නොලත් ස්ථානයක් එම පක්ෂයේ රැළිය පැවැත්වීම සඳහා යොදාගෙන ඇති බවට සමාජ මාධ්‍ය ඔස්සේ චෝදනාවක් එල්ල වී තිබේ.
මේ සම්බන්ධයෙන් thetime.lk කළ විමසීමකදී පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි නිහාල් තල්දූව පැවසුවේ එම පක්ෂයේ අදාළ රැළිය පවත්වන ස්ථානය සම්බන්ධයෙන් කිසිදු ගැටළුවක් නැති බවයි. විහාරමහාදේවි උද්‍යානය අසල එෆ්.ආර්. සේනානායක මාවතේ මැයි දින රැළිය පැවැත්වීමට ජනතා විමුක්ති පෙරමුණට අවශ්‍ය අනුමැතිය විධිමත් ලෙස ලබාදී ඇති බව ද පොලිස් මාධ්‍ය ප්‍රකාශකවරයා වැඩිදුරටත් සඳහන් කළේය.
අදාළ සමාජ මාධ්‍ය වාර්තාවල සඳහන් වූයේ ජනතා විමුක්ති පෙරමුණේ මැයි රැළිය පැවැත්වීම සඳහා ලබාදී ඇත්තේ බීආර්සී ක්‍රීඩාංගනය බවත්, ඊට එම පක්ෂයේ හිටපු පාර්ලිමේන්තු මන්ත්‍රී සුනිල් හඳුන්නෙත්ති ද ඉහළ පොලිස් නිලධාරීන් සමග මැයි රැළි පිළිබඳව පැවති සාකච්ඡාවකදී එකඟ වූ බවත් ය.