ඉන්දීය ප්‍රිමියර් ලීග් (IPL) – 2023 සඳහා සහභාගි වන ක්‍රීඩකයෙකු කොවිඩ් – 19 පරීක්ෂාවෙන් පොසිටිව් බවට තහවුරු වුවහොත් දින 7 ක නිරෝධායනයක සිටිය යුතු බවට බවට ඉන්දියානු ක්‍රිකට් පාලක මණ්ඩලය (BCCI) නියෝගයක් නිකුත් කර තිබේ.
පසුගිය වසර තුනක කාලයක් අනිවාර්ය වූ ජෛව ආරක්ෂිත බුබුලක ක්‍රීඩකයින් සිටිය යුතු වුවද එය තව දුරටත් අවශ්‍ය නොවන බවට ක්‍රීකට් ආයතන සහ බලධාරීන් තීරණය කර තිබෙන වටපිටාවක මෙම තත්ත්වය ඊට ප්‍රතිවිරුද්ධ බව ESPN වාර්තා කරයි.
කෙසේවෙතත් පසුගිය 2022 වසරේ ක්‍රියාත්මත වුණු පරිදි කොවිඩ් – 19 පොසිටිව් බව තහවුරු වුණු ක්‍රීඩකයින්ට සතියක කාලයක් හුදකලා වී සිටිය යුතුය යන තීරණය තවදුරටත් වලංගු බව IPL බලධාරීන් පවසා ඇත.
මෙම සතියේ සිට බලයලත් ආයතන වෙත බෙදා හැරීමට නියමිත IPL හි වෛද්‍ය මාර්ගෝපදේශ, අනුව ” පොසිටිව් ක්‍රීඩකයින්, දින හතක කාලයක් හුදකලා විය යුතුය. හුදකලා කාලය තුළ පොසිට්ව් පුද්ගලයින්ට කිසිදු තරගයකට හෝ ඕනෑම ආකාරයක ක්‍රියාකාරකමකට සහභාගී වීමට ඉඩ නොලැබේ.
“පස්වන දින සිට ඔවුන්ට RT-PCR වලට භාජනය විය හැක, ඔවුන් පැය 24ක් කිසිදු ඖෂධයක් නොමැතිව රෝග ලක්ෂණ නොමැතිව සිටිය යුතුය. පළමු ප්‍රතිඵලය නෙගටිව් වූ පසු 2 වැනි පරීක්ෂණය පැය 24ක පරතරයකින් සිදු කළ යුතුය. රැපිඩ් පරීක්ෂණ දෙකක් නෙගටිව් වූ පසුව යළි කණ්ඩායමට සහභාගි විය හැකිය.
මේ අතර පසුගිය අගෝස්තු මාසයේදී ඔස්ට්‍රේලියානු තුන් ඉරියව් ක්‍රීඩිකා Tahlia McGrath ඉන්දියාවට එරෙහිව පොදුරාජ්‍ය මණ්ඩලීය ක්‍රීඩා උළෙලේ T20 අවසන් තරගයේදී Covid-19 පොසිට්ව් බවට තහවුරු වුවද ක්‍රීඩා කළේය.
මැක්ග්‍රාත් කොව්ඩ් පොසිටිව් වී සිටියදී ක්‍රීඩා කළ පළමු ක්‍රිකට් ක්‍රීඩිකාව බවටද පත්විය.
එමෙන්ම පසුගිය වසරේ එංගලන්තයේ පැවති පොදු රාජ්‍ය මණ්ඩලීය ක්‍රීඩා තරගාවලිය මෙන්ම ඕස්ට්‍රේලියාවේ පැවති T20 ලෝක කුසලාන තරගාවලිය සඳහාද කොව්ඩ් පොසිටිව් ක්‍රීඩක ක්‍රීඩිකාවන් සඳහා සහභාගී වීමට ICC ය ක්‍රීඩකයින්ට අවසර ලබා දී තිබිණි.
කෙසේ වෙතත්, මෙම වසර අගදී ඉන්දියාවේ පැවැත්වීමට නියමිත එක්දින ලෝක කුසලානයේදීද මෙම ක්‍රියාවලියම සිදුකරයිද නැද්ද යන්න පිළිබඳ තවමත් නිශ්චිත නැත.