විශිෂ්ට සිනමා රංගනයක් හා එහිලා කරන ලද විශිෂ්ට වේශ නිරූපණයක් !!

ඇමෙරිකානු ජාතික තුරණු සම්මානනීය සිනමා අධ්‍යක්ෂකවරයකු වන Darren Aronofsky විසින් අධ්‍යක්ෂණය කරන ලද අපූරු තේමාවකින් යුතු චිත්‍රපටයකි The Whale ~ 2022 . නාටකීය ෂානරයට අත්වන මෙම අපූරු චිත්‍රපටය පුරු පැය 1 කුත් විනාඩි 57 ක ධාවන කාලයකින් යුත්තය .

ඇමෙරිකාවේ ලේඛක Samuel D. Hunter විසින් රචිත The Whale 2014 නවකතාව පාදක කරගනිමින් නිර්මාණය කරල ලද මෙම චිත්‍රපටයේ ප්‍රධාන චරිතය වනුයේ විශ්ව විද්‍යාලයක ඉංශ්‍රීසි සාහිත්‍යය උගන්වන ගුරුවරයකු පිළිබඳව ය. අසාමාන්‍ය ලෙස පෘථුල පුද්ගලයකු වන ඔහු කිසිිදු පාලනයකින් තොරව අධික ලෙස මේදය සහිත ආහාර ගනී. එහෙයින්ම ඔහුගේ ජීවිතය ඉතා අවදානම් තත්වයක තිබෙන බව වෛද්‍යවරුන්ගේ නිගමනය වේ. එම සාධකය කේන්ද්‍රගතව දිවෙන මෙම චිත්‍රපටය ප්‍රධාන චරිත සතරකින් සමන්විත වන්නේ ය .

මෙහි ඉතා සුවිශේෂී කාරණාව වන්නේ ප්‍රධාන චරිතය,නිරූපණය කරන හොලිවුඩ් සුපිරි නළු Brendan Fraser තම රංගන චාරිකාව තුළ කරන විශිෂ්ට සිනමා රංගනය හා එම චරිතය සදහා කරන ලද අද්විතීය වේශ නිරූපණය යි. මෙම චිත්‍රපටය සදහා වේශනිරූපණ ශිල්පීන් තිදෙනෙකු ඇතුළු විශේෂ කණ්ඩායමක් යොදාගෙන ඇත්තේ ය. ඔවුන් අතර Adrien Morot , Judy Chin හා Anne Marie Bradley ප්‍රධාන වේශනිරූපණ ශිල්පියෝ වූහ. ඔවුන් තිදෙනා විසිනි පුරු පැය හතරකට ආසන්න කාලයක් පුරා Brendan Fraser එම චරිතය සදහා වේෂරූපණය කළ බව කියැවේ.

පසුගියදා එක්තරා රූපවාහිනි නාලිකාවක් වෙනුවෙන් සම්මුඛ සාකච්ඡාවක් ලබාදෙමින් මෙහි ප්‍රධාන චරිතය රගපාන Brendan Fraser කියා සිටියේ මෙම චරිත නිරූපණය සදහා තමා ඉතා වෙහෙසකර ව්‍යයාත්මක නිරත වූ බවත් බොහෝ දිනයන්හි තමාට පැය කීපයක්ම මෙම වේශනිරූපණයෙන්ම කාලය ගතකරන්න සිදුවූ බවත් ය.

මෙම වේශනිරූපණයෙන් ඉක්බිතිව ඔහුට වෛද්‍යවරුන්ගේ උපදෙස් මත අවම වශයෙන් ආහාර-පාන දුන් බවත් එහිලා ඉතා මද වශයෙන් ජලය පානය කිරීමට සිදුවූ බවත් වැඩිදුරටත් කියැවේ.

කරුණු කාරණා කොයි හැටි වෙතත් ප්‍රධාන චරිතය නිරූපණය කරන Brendan Fraser ගේ හා මෙම චිත්‍රපටයේ ප්‍රධානවේශනිරූපණ ශිල්පීන් තිදෙනාගේ ඉතා වෙහෙසකර ව්‍යයාමය කිසිවිටෙකත් අපතේ නොගොස් ඇති බව පෙනේ. ඊට වෙසෙසින්ම ඉහළම සාධාරණය ඉෂ්ට වී ඇත්තේ ය.

පසුගියදා පවතින ලද Critics Choice Awards හීදී වසරේ හොදම නළුවා වශයෙන් Brendan Fraser ද 95 වැනි ඔස්කාර් සම්මාන උළෙලේ දී වසරේ හොදම නළුවා වශයෙන් නැවත වතාවක් Brendan Fraser ද වසරේ විශිෂ්ටතම වේශ නිරූපණය හා කොණ්ඩා සැරසිලි ( Best Makeup and Hairstyling ) වෙනුවෙන් පිදෙන ඔස්කාර් සම්මානය මෙම වේශනිරූපණ ශිල්පීන් තිදෙනා අතරේ බෙදී ගියේය.

නොලියාම බැරි මගේ සටහන

මෑත කාලීනව තිරගත වූ හොලිවුඩ් චිත්‍රපට අතුරෙන් මම දුටු අති විශිෂ්ටතම රංගන ත්‍රිත්වයක් පිළිබඳව මෙහිලා සදහන් කරනු කැමැත්තෙමි. එම රංගනයන් කොතරම් විශිෂ්ටද කිවහොත් ලොව ඕනෑම තරාතිරමක නළුවකුට හෝ නිළියකට එම රංගනයන් තුළින් උගතහැකි දෑ බොහෝ ය. ඒ තරමටම එම රංගන ත්‍රිත්වය සුවිශේෂී වන්නේ ය

එම අති විශිෂ්ට රංගනයන් ත්‍රිත්වය කුමක්ද ? ඒ අන් කිසිවක් නොව The Whale චිත්‍රපටයේ Brendan Fraser ඉදිරිපත් කරන විශිෂ්ට රංගනය , Evening ~ 2022 චිත්‍රපටයේ Bill Nighy විසින් ඉදිරිපත් කරන රංගනය හා Tar ~ 2022 චිත්‍රපටයේ Cate Blanchett විසින් ඉදිරිපත් කරන රංගනය යි.

2022 වර්ෂයේ දී යුරෝපීයේ ප්‍රදර්ශනය වූ චිත්‍රපට සියල්ල අතුරෙන් මෙම සුවිශේෂී රංගන ත්‍රිත්වය වඩාත්ම කැපී පෙනෙන අතර අපේ හදවත්හි සදා නොමියෙන මතකයන් සේ තැම්පත් වන්නේ ය .

යමෙකු තම ජීවිතය තුළ කරන කියන කිනම් හෝ කාර්යයක සාර්ථකත්වය රදා පවතින්නේ ඒ වෙනුවෙන් කරන අධ්‍යනය ,කැපවීම හා අවංකත්වය මතය .මෙම කාරණා ත්‍රිත්වය මෙහිලා කතාබහ කරන සිනමා රංගනය යන කාරණාව සම්බන්ධයෙන් ද අතිශයින්ම වලංගු වන්නේ ය .ඊට මෙම රංගනයන් ත්‍රිත්වය උදාහරණ වශයෙන් පෙන්වා දිය හැකිය.
මෙරට සිනමාවේ විශිෂ්ට සිනමා රංගවේදීන් සැලකිය යුතු සංඛයාවක් සිනමා රංගනය යනු කුමක්ද යන්න පිළිබඳව විදෙස් චිත්‍රපට නරඹමින් ද ඒ පිළිබඳව රචිත විදෙස් පොතපත කියවමින් ද තම රංගන කෞෂල්‍යය වර්ණවත් කරගත්තෝ වූහ. එහිලා මා දන්නා තරමින් සිංහල සිනමාවේ සක්විති ගාමිණී ෆොන්සේකා මහතා , ටෝනි රණසිංහ, හෙන්රි ජයසේන , ඩග්ලස් රණසිංහ යනාදී නළුවන් ද අයිරාංගනී සේරසිංහ, ට්‍රිලීෂියා ගුණවර්ධන, ස්වර්ණා මල්ලවආරච්චි , අනෝජා වීරසිංහ යනාදී නිළියන් ද ඉහළින්ම සිටන බව පෙනේ.

එනමුත් වර්තමානයේ මෙරට සිටින නළු නිළියන් බහුතරයක් තම රංගන හෝ ඒ පිළිබඳව අධ්‍යනය පිණිස කැප වෙනවා ද යන්න මට නම් සැක සහිතය.ඔවුනට අවශ්‍ය ජනප්‍රියත්වය හා එහිලා ආරූඪ කරගත් ව්‍යාජ පාණ්ඩිත්‍යයක් පමණි. එහි සමාජ පිළිඹිඹුව නම් බොහෝ නළු නිළියන්ට කිනම් හෝ සම්මුඛ සාකච්ඡාවක් තුළ ශාස්ත්‍රීය වශයෙන් සිනමාව හෝ රංගනය පිළිබඳවත් අඩුම තරමින් මෑතකදී තමන් විසින් නරඹන ලද විශිෂ්ට චිත්‍රපටයක් පිළිබඳවත් කතාබහ කිරීමට නොහැකි වීමයි. එම බොල්ගතිය පිළිඹිබු වන්නේ ඔවුන්ගේ සමාජය හිනස්සන හීනමාන කතා හා දේශපාලන වේදිකාවවල කරන නරි නාටක තුළිනි.

එවන් වූ වපසරියක් තුළ Brendan Fraser විසින් The Whale චිත්‍රපටයේ රංගනය වෙනුවෙන් කරන ලද කැපවීම හා රංගන කෞෂල්‍යය අපට වෙසෙසින්ම සිනමා රංගනය යනු කුමක්ද යන්න පිළිබඳව ඉගෙන පාඩම් රාශියක් ඉගෙන ගතහැකි අත්පොතක් ( A Handbook ) වන්නේ ය .

පූජ්‍ය ඇතිපොළ මංගල හිමි