මුදල් අමාත්‍යංශය යොදාගනිමින් ආණ්ඩුව පළාත් පාලන මැතිවරණය සඳහා මුදල් ලබාදීම දිගින්-දිගටම ප්‍රමාද කිරීම හේතුවෙන් ලබන අප්‍රේල් 25දා මැතිවරණය පැවැත්වීම ද අවිනිශ්චිත තත්ත්වයකට පත්ව තිබේ.
මැතිවරණ කොමිසමේ සභාපති නිමල් පුංචිහේවා පවසන්නේ බදාදා (15) වන විට රුපියල් මිලියන 500ක මුදලක් ලැබිය යුතු ව ඇති බවයි. ශ්‍රේෂ්ඨාධිකරණ නියෝගයට අනුව මුදල් මුදානොහැරීම සම්බන්ධයෙන් මැතිවරණය පැවැත්වීමේ ව්‍යවස්ථානුකූල වගකීම ඇති ආයතනය ලෙස මැතිවරණ කොමිසම අධිකරණයට කරුණු දැක්වීමට සූදානම් බව ද ඔහු සඳහන් කරයි.
කෙසේ වෙතත් ඉදිරි කටයුතු සම්බන්ධයෙන් සාකච්ඡා කිරීමට අද (13) හෝ හෙට (14) මැතිවරණ කොමිසම රැස්වන බව ද සභාපතිවරයා පැවසීය.
‘සාකච්ඡා කරනවා’
මේ සම්බන්ධයෙන් අප කළ විමසීමේදී ශ්‍රේෂ්ඨාධිකරණ නියෝගයට අදාළ පෙත්සම ඉදිරිපත් කළ සමගි ජන බලවේගයේ මහ ලේකම් රංජිත් මද්දුම බණ්ඩාර පැවසුවේ ඒ පිළිබඳව නීතිඥයන් සමග සාකච්ඡා කරමින් සිටින බවයි. නීතිඥවරුන්ගේ උපදෙස් මත අවශ්‍ය කටයුතු සිදුකරන බව ද ඔහු සඳහන් කළේය.
‘නීතියෙන් බාධාවක් නෑ’
මෙවැනි තත්ත්වයක් යටතේ වෙනත් මැතිවරණ දිනයක් ප්‍රකාශයට පත්කිරීමට සිදුවුවහොත්, ඊට නීතිමය බාධාවක් නැතැයි ද මැතිවරණ කොමිසමේ සභාපතිවරයා සඳහන් කරයි. මැතිවරණය නියමිත දිනට පැවැත්වීමට අවශ්‍ය කටයුතු සඳහා මේ මාසය අවසන් වන විට රුපියල් මිලියන 1,100ක මුදලක් ලැබිය යුතු ව ඇතැයි ද ඔහු පැවසීය.
‘තවම නෑ’
මේ අතර රජයේ මුද්‍රණාලයාධිපති ගංගානි ලියනගේ පවසන්නේ මැතිවරණ පත්‍රිකා මුද්‍රණ කටයුතු සඳහා ඉල්ලා ඇති රුපියල් මිලියන 533න්, රුපියල් මිලියන 339ක් මෙතෙක් ලැබී නැති බවයි. එම නිසා නියමිත පරිදි එම කටයුතු සිදු කිරීමේ හැකියාවක් නොමැතිව ඇතැයි ද ඇය සඳහන් කළේය.
‘තනියෙන් බෑ’
මුදල් අමාත්‍යංශ ලේකම් මහින්ද සිරිවර්ධන විසින් පසුගිය 10දා මැතිවරණ කොමිෂන් සභාවට දැනුම් දී තිබුණේ අදාළ මුදල් නිදහස් කිරීමට අනුමැතිය මෙතෙක් මුදල් ඇමති සහ ජනාධිපති රනිල් වික්‍රමසිංහගෙන් මෙතෙක් නොලැබුණු බවයි. මෙවැනි තත්ත්වයක් යටතේ තමන්ට තනි තීරණයක් ගත නොහැකි බව රනිල් වික්‍රමසිංහ දැනුම් දී තිබිණි.
අධිකරණ තීන්දුව
පළාත් පාලන මැතිවරණය පැවැත්වීම සඳහා පාර්ලිමේන්තුව මගින් අයවැය හරහා සම්මත කොට, වෙන්කර ඇති මුදල් ප්‍රතිපාදන රඳවාගැනීම වලක්වමින් ශ්‍රේෂ්ඨාධිකරණය විසින් භාණ්ඩාගාර ලේකම්වරයාට සහ ජනාධිපතිවරයා හෙවත් මුදල් ඇමතිවරයා වෙනුවෙන් පෙනී සිටි නීතිපතිවරයාට පසුගිය 03දා තහනම් නියෝගයක් නිකුත් කළේය.
සමගි ජන බලවේගයේ මහ ලේකම් රංජිත් මද්දුම බණ්ඩාර විසින් ගොනු කළ රීට් පෙත්සමක් සලකා බැලීමෙන් පසු ශ්‍රේෂ්ඨාධිකරණයෙන් මෙම නියෝගය නිකුත් කෙරිණි.
මෙම නියෝගයට අමතරව ඡන්ද පත්‍රිකා මුද්‍රණය සඳහා රජයේ මුද්‍රණාලයට වෙන්කර තිබෙන මුදල් ප්‍රතිපාදන රඳවාගැනීම ද වලක්වමින් රජයේ මුද්‍රණාලයාධිපතිවරිය වෙත ශ්‍රේෂ්ඨාධිකරණය එහිදී තවත් අතුරු නියෝගයක් නිකුත් කළේය.
ජනාධිපති නීතිඥ උපුල් ජයසූරිය මගින් ගොනුකළ මෙම පෙත්සමේ පළමු වගඋත්තරකරු ලෙස භාණ්ඩාගාර ලේකම් මහින්ද සිරිවර්ධන සහ දෙවැනි වගඋත්තරකරු ලෙස මුදල් ඇමති රනිල් වික්‍රමසිංහ නම් කර තිබේ. අනෙකුත් වගඋත්තරකරුවන් ලෙස මැතිවරණ කොමිසමේ සභාපති නිමල් පුංචිහේවා, එහි කොමසාරිස්වරුන් වන එස්.බී. දිවාරත්න, එම්.එම්. මොහොමඩ්, කේ.පී.පී. පතිරණ සහ කොමිසමේ කොමසාරිස් ජනරාල් සමන් ශ්‍රී රත්නායක නම් කර ඇත.
අට වැනි වගඋත්තරකරු ලෙස රජයේ මුද්‍රණාලයාධිපති ජී. කේ. ඩි. ලියනගේ සහ නව වැනි වගඋත්තරකරු ලෙස නීතිපතිවරයා නම් කර තිබේ.
පෙත්සමේ අරමුණ
පළාත් පාලන මැතිවරණය පැවැත්වීම සඳහා 3, 4, 5, 6, සහ 7 වගඋත්තරකරුවන්ට මුදල් ලබාදීම ප්‍රමාද කිරීම මගින් පළමු වගඋත්තරකරු වන භාණ්ඩාගාර ලේකම්වරයා සහ දෙවැනි වගඋත්තරකරු වන මුදල් ඇමතිවරයා විසින් පෙත්සම්කරු ඇතුළු සියලු පුරවැසියන්ගේ මූලික අයිතිවාසිකම් උල්ලංඝනය කර ඇතැයි නියෝගයක් නිකුත් කරන ලෙස මෙම පෙත්සමෙන් ඉල්ලා ඇත. වගඋත්තරකරුවන්ගේ ක්‍රියාකාරිත්වය මගින් ආණ්ඩුක්‍රම ව්‍යවස්ථාවේ 3 සහ 4 ව්‍යවස්ථා මගින් සහතික කර ඇති ජනතා පරමාධිපත්‍ය බලය ක්‍රියාත්මක කිරීම වලක්වා ඇති බවත්, එම නිසා ආණ්ඩුක්‍රම ව්‍යවස්ථාවෙන් තහවුරු කර ඇති 12(1) සහ 14(1)(අ) ව්‍යවස්ථාවල ඇති මූලික අයිතිවාසිකම් උල්ලංඝනය වී තිබෙන බවත් පෙත්සමේ සඳහන් ය.
12(1) ව්‍යවස්ථාව :
නීතිය පසිඳලීම සහ ක්‍රියාත්මක කිරීම ද, නීතියේ රැකවරණය ද සර්ව සාධාරණ විය යුත්තේය.
14(1)(අ) ව්‍යවස්ථාව :
සෑම පුරවැසියෙකුට ම භාෂණයේ නිදහසට සහ ප්‍රකාශනය ඇතුළු අදහස් පළකිරීමේ නිදහසට හිමිකම ඇත්තේය.
2022 දෙසැම්බර් 21 සහ 29 !
1946 අංක 53 දරන සංශෝධිත පළාත් පාලන මැතිවරණ ආඥා පනතේ 4(1) අනුව නිකුත් කරන ලද 2022 දෙසැම්බර් 21 දිනැති අංක 2311/26 දරන ගැසට් නිවේදනය මගින් වගඋත්තරකාර මැතිවරණ කොමිසමේ සාමාජිකයන් විසින් දිස්ත්‍රික් තේරීම් බාර නිලධාරීන් පත්කිරීමට අදාළ කටයුතු ආරම්භ කළ බවත්, පළාත් පාලන මැතිවරණ ආඥා පනතේ 27, 28 සහ 29 වගන්ති අනුව නිකුත් කරන ලද 2022 දෙසැම්බර් 29 දිනැති අංක 2312/44 දරන ගැසට් නිවේදනය මගින් වගඋත්තරකාර මැතිවරණ කොමිසමේ සාමාජිකයන් විසින් පිළිගත් දේශපාලන පක්ෂ සහ ස්වාධීන කණ්ඩායම්වලින් මැතිවරණය සඳහා ඇප මුදල් ලබාගැනීමට අදාළ ක්‍රියාවලිය ආරම්භ කළ බවත් පෙත්සමේ සඳහන් ය.
2023 ජනවාරි 04 !
එසේ ම වගඋත්තරකාර මැතිවරණ කොමිසමේ සාමාජිකයන් විසින් 2023 ජනවාරි 04 දිනැති නිවේදනය මගින් දිස්ත්‍රික් තේරීම් බාර නිලධාරීන් මගින් ඇල්පිටිය ප්‍රාදේශීය සභාව හැර අනෙකුත් පළාත් පාලන ආයතන 340ක් සඳහා තරග කරන අපේක්ෂකයන්ගෙන් නාමයෝජනා කැඳවීම ආරම්භ කළ බවත්, ඉන්පසු 2023 මාර්තු 09 මැතිවරණය පවත්වන දිනය ප්‍රකාශයට පත්කළ බවත් පෙත්සම්කරු සඳහන් කරයි.
2023 පෙබරවාරි 17 !
මේ අතර 2023 පෙබරවාරි 17දා පෙත්සමේ පළමු වගඋත්තරකරු වන භාණ්ඩාගාර ලේකම්වරයා විසින් පළාත් පාලන මැතිවරණය පැවැත්වීම සඳහා මුදල් ලබාදිය නොහැකි බව වගඋත්තරකාර මැතිවරණ කොමිසමේ සාමාජිකයන්ට දැනුම් දීමේ අනපේක්ෂිත පුවත ඇසීමෙන් පෙත්සම්කරු දැඩි කම්පනයට පත්වූ බවත්, ඊට හේතුව ලෙස දෙවැනි වගඋත්තරකරු හෙවත් ජනාධිපතිවරයා නිකුත් කළ අත්‍යවශ්‍ය සේවා සඳහා පමණක් මුදල් ලබාදීමේ චක්‍රලේඛයක් උපුටා දක්වා ඇති බව වගඋත්තරකාර මැතිවරණ කොමිසමේ සභාපතිවරයා මාධ්‍ය වෙත පැවසූ බවත් පෙත්සම මගින් අවධාරණය කර සිටී.
රුපියල් බිලියන 10ක්
භාණ්ඩාගාර ලේකම්වරයා සහ මුදල් ඇමතිවරයා මෙසේ කටයුතු කර ඇත්තේ 2023 අයවැය මගින් පාර්ලිමේන්තුවේ බහුතර ඡන්දයෙන් මැතිවරණ පැවැත්වීම සඳහා රුපියල් බිලියන 10ක් වෙන්කර තිබියදී බව ද එහි වැඩිදුරටත් දැක්වේ.
පාලනය කළ නොහැකි හේතු
එසේ ම පාලනය කළ නොහැකි හේතු නිසා බව සඳහන් කරමින් පෙත්සමේ වගඋත්තරකාර මැතිවරණ කොමිසම මගින් තැපැල් ඡන්ද කල්දැමූ බවත්, ඊට පෙත්සමේ වගඋත්තරකරුවෙකු ලෙස සඳහන් රජයේ මුද්‍රණාලයාධිපති විසින් තැපැල් ඡන්ද පත්‍රිකා මුද්‍රණය කිරීමට මුදල් නොමැති බව දැනුම් දීම හේතු වූ බවත් එහි සඳහන් ය.
පෙත්සම්කරුගේ ඉල්ලීම්
මේ ක්‍රියාවලිය නිසා ආණ්ඩුක්‍රම ව්‍යවස්ථාවේ සඳහන් ජනතා පරමාධිපත්‍යය බලය ක්‍රියාත්මක කිරීම ගැටළුවක් වී ඇති ආකාරයත්, එමගින් පෙත්සම්කරු ඇතුළු පුරවැසියන්ගේ මූලික අයිතිවාසිකම් උල්ලංඝනය වන ආකාරයත් පෙත්සම මගින් පැහැදිලි කර ඇත.