අද (මාර්තු 11) උදෑසන කුරුණෑගල-බමුණාකොටුව ප්‍රදේශයේ සංස්කෘතික මධ්‍යස්ථානයක් විවෘත කිරීමේ අවස්ථාවකට පැමිණි බුද්ධශාසන, ආගමික හා සංස්කෘතික කටයුතු පිළිබඳ අමාත්‍ය විදුර වික්‍රමනායකට සහ පශු සම්පත් රාජ්‍ය අමාත්‍ය ඩී.බී හේරත්ට හූ කියා විරෝධය පළකර තිබේ.
මෙම සංස්කෘතික මධ්‍යස්ථානය බුද්ධ ශාසන, ආගමික හා සංස්කෘතික කටයුතු අමාත්‍යංශය මගින් ප්‍රතිපාදන වැයකොට ඉදිකරන ලද්දක් වන අතර මෙම විවෘත කිරීමට අදාල ආරාධනා පත්‍රයට අනුව ප්‍රාදේශිය කලාකරුවන්ගේ සහභාගිත්වයෙන් එය සිදු කිරීමට නියමිතව තිබිණි.
එසේ වුවද ඒ සඳහා කිසිඳු කලාකරුවෙකු සහභාගි වී නොසිටි බවටද තොරතුරු වාර්තා වේ.
කෙසේවෙතත් මෙම අවස්ථාවට වාහන කිහිපයකින් ආරක්ෂක නිලධාරීන්ද සමග අනාරාධිතව පැමිණි දේශපාලනඥයින් හට ජනතාව එලෙස සිය විරෝධය දක්වා තිබේ.
පසුගිය කාලවකවානුව පුරාම වත්මන් රජය නියෝජනය කරන දේශපාලනඥයින්ට ජනතාවගෙන් දැඩි විරෝධතා එල්ලවීම හේතුවෙන් බොහොමයක් රජයේ අමාත්‍යවරුන් ඇතුළු පිරිස මේ වනවිට උත්සව සහ රැස්වීම් සඳහා සහභාගිවීමෙන් වැලකී සිටිති.
වීඩියෝව පහතින්