පොලිසිය විෂය බාර ඇමති ටිරාන් අලස් ශ්‍රී ලංකා මානව හිමිකම් කොමිෂන් සභාවට කැඳවීම සම්බන්ධයෙන් එම කොමිෂන් සභාවේ කොමසාරිස්වරුන් අතර බෙදීමක් ඇති වී තිබෙන බව මාධ්‍ය මගින් වාර්තා කෙරිණි.
මෙය සත්‍යයක් ද සහ එවැනි කැඳවීමක් සඳහා කොමසාරිස්වරුන්ගේ අනුමැතිය අවශ්‍ය ද යන්න සම්බන්ධයෙන් thetime.lk අපි සොයාබැලීමක් කළෙමු.
කොමිෂන් සභාව මගින් සිදුකරන විමර්ශනයක් සඳහා කැඳවන්නේ කවුද යන්න තීරණය කිරීමේ බලය සම්පූර්ණයෙන් ම විමර්ශන නිලධාරීන් සතු වේ. සම්ප්‍රදායක් ලෙස කොමසාරිස්වරුන්ට මෙම කැඳවීම් පිළිබඳව දැනුම් දුන්නද, ඔවුන්ගේ අනුමැතිය ලබාගැනීම අවශ්‍ය නොවේ.
මේ සම්බන්ධයෙන් අප කළ විමසීමකදී කොමිෂන් සභාවේ හිටපු කොමසාරිස්වරයෙකු පැවසුවේ සාමාන්‍යයෙන් එවැනි දැනුම් දීම්වලට ප්‍රතිචාර නොදක්වන බවයි. ඊට හේතුව විමර්ශන ස්වාධීන ව සිදුකිරීම සඳහා ඉඩ ලබාදීම බව ද එම කොමසාරිස්වරයා පැවසීය.
මෙවැනි කැඳවීම් සඳහා කොමසාරිස්වරුන්ගේ අනුමැතිය අත්‍යවශ්‍ය බවට කොන්දේසියක් තිබුණහොත්, කොමසාරිස්වරුන්ගේ කැමැත්ත දෙයාකාර වන අවස්ථාවලදී විමර්ශන අඩපණ වීමේ ඉඩක් පවතින බව ද ඔහු අවධාරණය කළේය.
කොමිෂන් සභාව අභ්‍යන්තරයෙන් අප කළ සොයාබැලීමේදී මීට පෙර ඌව මහ ඇමති චාමර සම්පත් කැඳවීම ද මීට සමාන බව දැනගන්නට ලැබිණි. ගුරුවරියකට බලපෑම් කිරීමට අදාළ ව ඔහු කොමිෂන් සභාව වෙත කැඳවන ලදි. මහ ඇමතිවරයා සහ කැබිනට් ඇමතිවරයා පරිපාලන ව්‍යූහය තුළ සමාන තත්ත්වයේ සිටින්නන් ය.
