පෙකණිවැල කපා නැති අඩු මාසයේ කලල
යළිත් ගර්භාෂයක සැඟවෙන්න දුවනවද
දුවද්දී පෙකණිවැල එතෙනකොට කුඹගහක
මේ කලල පනිනවැති උඩුබැලිව කරදියට.
නැංගුරම් බදාගෙන ජැටිය ළඟ ගිලෙනකොට
හොයනවැති ආයෙමත් ගර්භාෂයක පිහිට.
පෙකණිවැල කපා නැති අඩු මාසයේ කලල
යළිත් ගර්භාෂයක සැඟවෙන්න දුවනවද
බාදියෙන් උදම් වී වඩදියෙන් සිනාසෙන
ජීවිතය වෙරළ උඩ අව්ව තපිනා මොහොත
පෙකණිවැල එතෙනකොට වෙරළ බඩ පොල්ගහක
හොයනවැති ආයෙමත් ගර්භාෂයක පිහිට.
පෙකණිවැල කපා නැති අඩු මාසයේ කලල
යළිත් ගර්භාෂයක සැඟවෙන්න දුවනවද
ආදරය අහිමි වී හූල්ලන ගොම්මනක
පෙකණිවැල එතෙනකොට බයිසිකල් රෝදයක
වොල්කනයිසින් රබර් හීනයක් හපනකොට
හොයනවැති ආයෙමත් ගර්භාෂයක පිහිට.
පෙකණිවැල කපා නැති අඩු මාසයේ කලල
යළිත් ගර්භාෂයක සැඟවෙන්න දුවනවද
සීනි දා වෙඩි තියන රයිපලේකුත් රැගෙන
දඹුලු ගල දිගේ තලගොයි හොයන මිනිසෙකුට
පැටළුණොත් පෙකණිවැල සීගිරියෙ සිතුවමක
හොයනවැති ආයෙමත් ගර්භාෂයක පිහිට.
පෙකණිවැල කපා නැති අඩු මාසයේ කලල
යළිත් ගර්භාෂයක සැඟවෙන්න දුවනවද
ගෝදම්බ රොටිය උඩ ලෝක සිතියම ඇඳෙන
සීනි පොල්කොහු සතුට උලාකන ඇඳිරියක
පෙකණිවැල එතෙනකොට රේස් බුකියක දොරක
හොයනවැති ආයෙමත් ගර්භාෂයක පිහිට.
පෙකණිවැල කපා නැති අඩු මාසයේ කලල
යළිත් ගර්භාෂයක සැඟවෙන්න දුවනවද
ටොනික් පියනක් ගිලෙන වැඩවසම් සාදයක
ගල් කාලකින් විඳින බොල්ෂෙවික් ප්රීතියක
පෙකණිවැල එතෙනකොට බාබෙකිව් ගින්දරක
හොයනවැති ආයෙමත් ගර්භාෂයක පිහිට.
පෙකණිවැල කපා නැති අඩු මාසයේ කලල
යළිත් ගර්භාෂයක සැඟවෙන්න දුවනවද
හඳ එළිය ලෑටි ගා උලාකන මැදියමක
සාස්පානක දපන විනාකිරි හීනයක
පෙකණිවැල එතෙනකොට බකමූණු හාදුවක
හොයනවැති ආයෙමත් ගර්භාෂයක පිහිට.
පෙකණිවැල කපා නැති අඩු මාසයේ කලල
යළිත් ගර්භාෂයක සැඟවෙන්න දුවනවද.