පොලිසිය විසින් කොළඹ විශ්වවිද්යාලයේ නීති පීඨය තුළට කඳුළු ගෑස් ප්රහාර එල්ල කිරීමත්, ඊට ඇතුළුවීමත් සම්බන්ධයෙන් විශ්වවිද්යාල ආචාර්යවරු දැඩි විරෝධය පළකරති.
මේ සම්බන්ධයෙන් අදහස් දක්වන එම පීඨයේ මහාචාර්ය වසන්තා සිරිවර්ධන අවධාරණය කරන්නේ ආණ්ඩුක්රම ව්යවස්ථාවෙන් සුරක්ෂිත කර ඇති ජනතාවගේ මූලික අයිතිවාසිකම් උල්ලංඝනය කිරීම පිළිබඳව විරෝධය පළකරන බවත්, ඊයේ (07) නීති පීඨය තුළ සිටි සිසුන්ට එල්ල කළ කඳුළු ගෑස් ප්රහාරය දැඩි ව හෙළා දකින බවත් ය.
නීතිය උගන්වන ආචාර්යවරුන් ලෙස අදහස් ප්රකාශනයේ නිදහස සහ සාමකාමී ව රැස්වීමේ අයිතිය පිළිබඳව විශ්වවිද්යාල සිසුන්ට උගන්වමින් සිටියද, ඒවා මේ රටේ බරපතළ ලෙස උල්ලංඝනය වෙමින් පවතින බව ද මහාචාර්යවරිය සඳහන් කරයි.
මේ සම්බන්ධයෙන් අප කළ විමසීමකදී පොලිස් මාධ්ය ප්රකාශක, ජ්යෙෂ්ඨ පොලිස් අධිකාරි නිහාල් තල්දූව පැවසුවේ ඇතැම් පාර්ශ්ව සඳහන් කරන ආකාරයට විශ්වවිද්යාල තුළට ඇතුළු වීමේ තහනමක් නැති බවයි. එහෙත් මෙහිදී සිදු වී ඇත්තේ කුමක්ද සහ ඊට ඇතුළු වීමට හේතුව කුමක්ද යන්න සම්බන්ධයෙන් තමන් නිවැරදිව දැනුවත් වී නැති බවත්, එම නිසා ඊට යම් කාලයක් අවශ්ය බවත් ඔහු සඳහන් කළේය.
කොළඹ නගර සභා ශාලාව අසලින් ආරම්භ කරන ලද අන්තර් විශ්වවිද්යාල ශිෂ්ය බල මණ්ඩලයේ විරෝධතා පාගමන නතර කිරීමට කොළඹ විශ්වවිද්යාලය අසලදී පොලිසියෙන් කඳුළු ගෑස් සහ ජල ප්රහාර එල්ල කරන ලදි. ආරක්ෂක අංශ අතර සිටි නිල ඇඳුම් ඇඳගත් පොලු රැගත් කණ්ඩායමක් විසින් විශ්වවිද්යාල සිසුන්ට පහරදීමට දැරූ උත්සාහය ව්යර්ථ වූයේ ඔවුන්ට ජනතාවගෙන් දැඩි විරෝධයක් එල්ල වීම නිසා ය.
මෙම ප්රහාරයට විරෝධය පළකරමින් අද (08) දහවල් එම ස්ථානයේදී විශ්වවිද්යාල සිසුන්, සමාජ ක්රියාකාරීන් ඇතුළු විශාල පිරිසකගේ සහභාගිත්වයෙන් විරෝධතාවක් ද පැවැත්වීමට සැලසුම් කර ඇත.