බංග්ලාදේශයේ කොක්ස් බසාර් හි රොහින්ග්යා සරණාගත කඳවුරක් තුළ ඇතිවූ ගින්නක් හේතුවෙන් දහස් ගණනකට සිය නිවාස අහිමි වී තිබේ.
ඊයේ (ඉරිදා 05) කුටුපලොන්ග් සරණාගත කඳවුර හරහා පැතිර ගිය මෙම ගින්න හේතුවෙන් 12,000 ක් පමණ නිවාස අහිමි වූ බව ප්රාදේශීය පොලිස් අධිකාරී මොහොමඩ් මහෆුසුල් ඉස්ලාම් මාධ්ය වෙත පවසා ඇත.
ගින්නෙන් නිවාස 2,000 ක් පමණ සම්පූර්ණයෙන් විනාශ වී ඇති අතර රෝහල් සහ අධ්යාපන පහසුකම් සැපයු මධ්යස්ථාන අනූවක් පමණ මෙම ගින්නෙන් විනාශ වී තිබේ.
පැය තුනක පමණ කාලයකට පසුව ඒකාබද්ධ මෙහෙයුමක් මඟින් ගින්න මැඩපවත්වා ඇති බව විදෙස් වාර්තා සඳහන් කළේය.
ඒ සඳහා ගිනි නිවන බට පිරිස් සහ ඒ පිළිබඳ පුහුණුව ලැබූ රෝහින්ග්යා සරණාගත ස්වේච්ඡා සේවකයන් ගින්න පාලනය කිරීමට දායක වී ඇත.
ගින්නට හේතුව මෙතෙක් අනාවරණ වී නොමැති නමුත් ඒ පිළිබඳ පරීක්ෂණයක් ක්රියාත්මක බව පෙන්වාදෙන පොලිස් අධිකාරීවරයා ජීවිත හානි කිසිවක් මෙතෙක් වාර්තා වී නොමැති බවද පවසා ඇත.
මේ වනවිට නිවාස අහිමි වූවන්ට ආහාර සහ තාවකාලික නවාතැන් සැපයීම සඳහා බලධාරීන් ජාත්යන්තර සහ දේශීය මානව හිමිකම් සංවිධාන සමඟ කටයුතු කරමින් සිටින බව විදෙස් මාධ්ය සඳහන් කරයි.
මෙම ගින්න සහ වත්මන් තත්ත්වය පිළිබඳව අදහස් දක්වමින් ‘Save the Children’ සංවිධානය පවසා සිටියේ කඳවුරුවල සිරවී සිටින ළමයින්ගේ අනාගතය අඳුරු සහගත බවයි.
එමෙන්ම මෙම ගින්න හේතුවෙන් බොහෝ පවුල්වල ආරක්ෂාව සහ ඔවුන් සතුව ඉතිරිව ඇති කුඩා දේ ද අහිමි කළ බවද ඔවුන් පෙන්වාදෙයි.