මැතිවරණය නොපැවැත්වීම ඇතුළු කරුණු රැසකට විරෝධය පළ කරමින් ජාතික ජන බලවේගය අද (26) පැවැත්වීමට නියමිත විරෝධතාවය ඉලක්ක කරමින් ජාතික ජන බලවේගයේ නායක අනුර දිසානායක ඇතුළු 26 දෙනෙකුට, ජනාධිපති මන්දිරය, ජනාධිපති ලේකම් කාර්යාලය, ගාලු මුවදොර ඇතුළු කොළඹ ප්‍රදේශ රැසකට ඇතුළුවීම වළක්වමින්, කොළඹ කොටුව මහේස්ත්‍රාත් අධිකරණය තහනම් නියෝගයක් නිකුත් කර තිබේ.
ඒ අනුව අද පස්වරු 1.00 සිට රාත්‍රී 8.00 දක්වා ඉහත සඳහන් ප්‍රදේශ ඇතුළු කොටුව පොලිසිය විසින් නම් කරන ලද මාර්ග වලට උද්ඝෝෂකයින්ට ඇතුළු විය නොහැක.
කොටුව, කොම්පඤ්ඤ වීදිය සහ කොල්ලුපිටිය පොලිස් ස්ථානාධිපතිවරුන් කළ ඉල්ලීමකට අනුව මෙම තහනම් නියෝගය නිකුත් කළ බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි නීතිඥ නිහාල් තල්දුව සඳහන් කළේය.
එම තහනම් නියෝගය අනුර දිසානායක, ටිල්වින් සිල්වා, විජිත හේරත්, සුනිල් හඳුන්නෙත්ති, කේ.ඩී ලාල්කාන්ත, හරිනි අමරසූරිය ඇතුළු දේශපාලනඥයින් සහ වෘත්තීය සමිති නායකයින් 26 දෙනෙකුට එරෙහිව නිකුත් කර ඇත.
