පළාත් පාලන මැතිවරණය ප්‍රකාශයට පත්කිරීමේ නිත්‍යනුකූලභාවය සම්බන්ධයෙන් අදහස් ප්‍රකාශ කිරීමේ අයිතියක් ජනාධිපති රනිල් වික්‍රමසිංහට නොමැති බව ජාතික ජන බලවේගයේ නායක අනුර කුමාර දිසානායක පවසයි.
මැතිවරණය සම්බන්ධයෙන් ගැටළුවක් තිබේ නම්, එය අධිකරණය විසින් විසඳිය යුතු ප්‍රශ්නයක් බව ද ඔහු සඳහන් කරයි. මැතිවරණ කොමිෂන් සභාව නීත්‍යනුකූල නොවන ආකාරයට කටයුතු කර තිබේ නම්, ජනාධිපතිවරයාට අධිකරණයට ගොස් ඊට අදාළ තීන්දුවක් ලබාගත හැකි බව ද අනුර කුමාර දිසානායක අවධාරණය කර සිටී.
‘ජනවාරි පස්වැනිදා මැතිවරණ කොමිසම මැතිවරණය ප්‍රකාශයට පත්කළා. කොමිසම නාමයෝජනා සහ ඇප මුදල් බාරගත්තා. ජනවාරි 21 වැනිදා මැතිවරණ දිනය සහ තැපැල් ඡන්ද දින ප්‍රකාශයට පත්කළා. මැතිවරණ කොමිසම කියන්නෙ මේ සියලු ක්‍රියාමාර්ග ව්‍යවස්ථානුකූලයි සහ නිත්‍යනුකූලයි කියලා. නියමිත පරිදි ගැසට් නිකුත් කර තිබෙනවා. ජනාධිපතිවරයා පාර්ලිමේන්තුවට බොරු කිව්වෙ තමන්ගේ වැඩේ කරගන්න.’
ඡන්දෙ කල්දාන්න ඉල්ලුවද?
විපක්ෂයේ පාර්ලිමේන්තු මන්ත්‍රීවරුන් විසින් මැතිවරණය කල්දමන ලෙස තමන්ගෙන් ඉල්ලා සිටි බව ද පෙරේදා (23) ජනාධිපතිවරයා පාර්ලිමේන්තුවේදී පැවසීය.
මේ සම්බන්ධයෙන් අදහස් දක්වමින් අනුර කුමාර දිසානායක මන්ත්‍රීවරයා පැවසුවේ මන්ත්‍රීවරුන් 225ම ලිඛිතව ඉල්ලා සිටියත්, මැතිවරණය කල්දැමීමේ බලය ජනාධිපතිවරයාට නොමැති බවයි. ඒ පිළිබඳ තීරණය කිරීමේ බලය ඇත්තේ මැතිවරණ කොමිෂන් සභාවට පමණක් බව ද ඔහු සඳහන් කළේය.
අධිකරණයෙන් බාධාවක් නෑ !
අධිකරණය මගින් මැතිවරණයට කිසිදු බාධාවක් එල්ල කර නැති බව ද අවධාරණය කළ මන්ත්‍රීවරයා, ජනාධිපතිවරයාගේ ප්‍රජාතන්ත්‍රවිරෝධී ගමන පරාජයට පත්කිරීමට ඉදිරියට එන ලෙස සියලු දේශපාලන පක්ෂ ප්‍රමුඛ සමස්ත ජනතාවගෙන් ඉල්ලා සිටියේය.
කොමිසමේ නිවේදනය !
පවතින තත්ත්වය යටතේ පාලනය කළ නොහැකි හේතු මත මාර්තු 09දා පළාත් පාලන මැතිවරණය පැවැත්වීමේ හැකියාවක් නොමැති බවත්, එම මැතිවරණය පවත්වන්නේ කවදාද යන්න සම්බන්ධයෙන් ලබන 03දා දැනුම් දෙන බවත් ඊයේ (24) නිවේදනයක් නිකුත් කරමින් මැතිවරණ කොමිෂන් සභාව සඳහන් කළේය.