තමන්ට අපහාසයක් සිදු වන ආකාරයේ ප්‍රකාශයක් කිරීම සම්බන්ධයෙන් දුලාංජලී ජයකොඩි විසින් ජාතික ජන බලවේගයේ නායක අනුර කුමාර දිසානායකට එරෙහිව නීතිමය පියවර ගන්නා බව සඳහන් කරමින් එන්තරවාසියක් යොමුකර තිබේ.
දුලාංජලී ජයකොඩි යනු සමගි ජන බලවේගයේ නායක සහ විපක්ෂ නායක සජිත් ප්‍රේමදාසගේ සහෝදරියයි.
2017 වසරේ සිදු වූ බව පැවසෙන මූල්‍ය ගනුදෙනුවකට අදාළ ව අනුර කුමාර දිසානායක විසින් පසුගිය දිනෙක ප්‍රසිද්ධ වේදිකාවකදී සිදු කළ ප්‍රකාශයකට අදාළ ව මෙම එන්තරවාසිය යොමුකර තිබේ. ජනාධිපති නීතිඥ ෆර්මන් ජේ. කාසිම් මගින් පසුගිය 22දා මෙම එන්තරවාසිය යොමුකර ඇත.
ව්‍යාපාරික ගනුදෙනුවකට අදාළ ව මුදල් ගෙවීමක් සිදුකිරීමේදී ඒ සඳහා ව්‍යාජ ලෙස මුද්‍රණය කළ මුදල් දුලාංජලී ජයකොඩි වෙත බාරදීම සම්බන්ධයෙන් පුද්ගලයෙකු 2017 මැයි 22දා මහාධිකරණයේදී වරද පිළිගෙන තිබුණු බවත්, ඒ වෙනුවෙන් විපක්ෂ නායකවරයාගේ නැගණියට රුපියල් මිලියන 2ක වන්දියක් ලැබුණු බවත්, එසේ තිබියදී අනුර කුමාර දිසානායක විසින් එම චෝදනාව තමන්ට බැර කර ඇති බවත් අදාළ එන්තරවාසියේ සඳහන් වේ. එහි නඩු අංකය වන්නේ HC/8378/15 බව ද එහි දැක්වේ.