සිරි ගුණසිංහ හා රුව දෑසෙහි වැදෙන
හැමවිට මගේ මතකය ඈතට ඇදෙන
අදටත් එදා මෙන් ඔහු හද තුළ රැඳෙන
ඇත තුන් වතාවක් හමුවී අප දෙදෙන
වෙසෙනා අතරතුර මහැදුරු කැනඩාවේ
ඉදහිට නිවාඩුවකට මව්රට ආවේ
ඉන් එක වතාවක ” හමුවෙමු” මම කීවේ
පළවෙනි වරට එහෙමයි අපි හමුවූවේ
හමුවුණු වෙලේ සිට ඇහුවෙම නොයෙක් පැන
ඒ හැම එකකටම ඔහු උත්තරත් දෙන
හාරාඅවුස්සන මාගේ විදිය මැන
සමහර තැනකදී හයියෙන් හිනාවුණ
ගැන්සිය ගැහුණු අය නම් ගින්දර වැනියේ
කදිමයි ප්‍රොඩක්ෂන් ටික එම කොම්පැනියේ
එදවස ඇකඩමික් බර අවි බලඇණියේ
කොහොමද සර් මතකය පේරාදෙණියේ
පෑමට ශිල්ප නොයෙකුත් තරමින් සවියේ
සෙබලෙක් තමයි දන්නේ තතු තම අවියේ
කරුණක් අහන්නෙමි ඔබෙ සාහිත දිවියේ
කියමුකො ටර්න් එක ගත් නිදහස් කවියේ
කදිමට හවුල් කරගෙන හුරුපුරුදු නඩේ
එක් එක්කෙනාගෙන් අරගෙන නියම හැඩේ
සිනමාවට ඇවිත් ඔබ කළ එකම වැඩේ
අදටත් චිත්‍රපටි අතරින් හොදම ගොඩේ
තම රංඟනය අරගෙන නිති නිසි බරට
පසු කාලයක මරු නිළියක් වුණු මෙරට
කැමරාවකට හසුකර පළවෙනි වරට
කොහොමද ස්වර්ණ ගත්තේ සත්සමුදුරට
ඩී.බී. ඔබේසේකර ඇල්විටිගලලා
සේකර අමරදේවල ගී රස නෙලලා
එඩ්මන්ඩ් සිරිල් දෙනවක වැනි අය අලලා
ඇතිවුණෙ ප්‍රේමයක් සත්සමුදුර බලලා
කැන්නා ඔහුගෙ දිවි තතු අතොරක් නැතුව
ලොකු ඉතිහාසයක් ඇත ප්‍රොෆෙසර් සතුව
රසවත් කතා එද්දි ටික ටික මතුව
ඔහු හඬ උස් පහත් කළෙ මතකම ඇතුව
තුන්වෙනි දිනයි ඒ අතරින් හොද දවස
පැය දෙක තුනක් ගත කළෙ අප එම නිවස
ඔහු ඇරයුමෙන් නිවුණා විතකින් පවස
මතකම හවස් මැද එය නම් මරු හවස
නැත්නම් හදිසියක් යළි හනිකටම යන
බොමු අපි විස්කි චුට්ටක් තව වෙලා ගෙන
ඒ ඇරයුමට මගෙ හිත මල් පිපී එන
මේවට ඉතිං හේතුව පෙර කරපු පින
ඉතිහාසයේ මෙහෙමත් අප ඇත හැසිරී
එක්තැන් කළ යුතුයි මෙම මතකය විසිරී
හමුවුණු චරිත අතරින් අගයෙන් සසිරී
ලිව්වේ මෙලෙස සිරි ඇසුරක සිරි අසිරී
ප්‍රියන්ත කොඩිප්පිලි
