පළාත් පාලන මැතිවරණය පැවැත්වීම කල්දමන ලෙස ඉල්ලමින් යුද හමුදාවේ විශ්රාමික කර්නල් ඩබ්ලිව්.එම්.ආර්. විජේසුන්දර ගොනු කර තිබූ පෙත්සම කඩිනමින් විභාගයට ගන්නා ලෙස ඉල්ලමින් ඉදිරිපත් කළ මෝසම සලකා බැලීම අනවශ්ය බව ඔහුගේ නීතිඥවරුන් විසින් අද (20) ශ්රේෂ්ඨාධිකරණයට දැනුම් දුන්නේය.
මෙම පෙත්සම 23දා කැඳවීමට නියමිත ව තිබිණි. එහෙත් මැතිවරණයේ තැපැල් ඡන්ද විමසීම පැවැත්වීමට නියමිතව තිබුණේ 22දා ය. එම් නිසා පෙත්සම අදාළ දිනට පෙර සලකා බලන ලෙස පෙත්සම්කරුගේ පාර්ශ්වයෙන් මෝසමක් ඉදිරිපත් කෙරිණි. එය සලකා බැලීම සඳහා අද කැඳවන ලදි.
තැපැල් ඡන්දය කල්දැමීමට මැතිවරණ කොමිෂන් සභාව තීරණය කර ඇති නිසා මෝසම අනවශ්ය බව ද නීතිඥවරු වැඩිදුරටත් අධිකරණයට දැනුම් දුන්හ.
ඒ අනුව අදාළ පෙත්සම සලකා බැලීම සඳහා කලින් නියම කළ පරිදි ලබන 23දා කැඳවීමට ශ්රේෂ්ඨාධිකරණය නියම කළේය.
මෙම පෙත්සමේ වගඋත්තරකරුවන් ලෙස නම් කර ඇත්තේ මැතිවරණ කොමිසමේ සභාපති, එහි සාමාජිකයන් ඇතුළු නවදෙනෙකි. එස්. තුරෙයිරාජා සහ ශිරාන් ගුණරත්න ඇතුළු විනිසුරු මඩුල්ලක් හමුවේ පෙත්සම කැඳවේ.
මේ අතර මැතිරණය පැවැත්වීමට ඇති දුෂ්කරතා සම්බන්ධයෙන් මැතිවරණ කොමිසම මගින් අද (20) පස්වරුවේ හෝ හෙට (21) උදෑසන මෝසමකින් ශ්රේෂ්ඨාධිකරණයට කරුණු ඉදිරිපත් කිරීමට නියමිත ය. මීට පෙර මැතිවරණය පවත්වන බවට කොමිසම මගින් ශ්රේෂ්ඨාධිකරණයට ප්රතිඥා ලබා දී තිබිණි.
එහෙත් රජයේ මුද්රණාලය මගින් නියමිත පරිදි තැපැල් ඡන්ද පත්රිකා මුද්රණය කොට බාරනොදීම, අනෙකුත් මැතිවරණ වියදම් සඳහා මුදල් වියදම් කිරීමට නොහැකි බව මුදල් අමාත්යංශයේ ලේකම් මහින්ද සිරිවර්ධන විසින් මැතිවරණ කොමිසමට නිල වශයෙන් දැනුම් දීම ඇතුළු හේතු නිසා මැතිවරණ රාජකාරි තාවකාලිකව අත්හිටුවන බවට කොමිසමෙන් දිස්ත්රික් තේරීම් බාර නිලධාරීන්ට ලිඛිත ව දන්වනු ලැබිණි.