රුපියල් කෝටි 10කට අධික සෘජු වියදමක් දරමින් පවත්වන විශේෂ ජනරජ පෙරහැර අද (19) පස්වරු 6.30 සිට මහනුවරදී වීදි සංචාරය කිරීමට නියමිත ය. මෙම වියදමට අමතරව රජයේ නිල වාහන ඇතුළු වෙනත් වියදම් සඳහා ද විශාල මුදලක් වැය කෙරේ.
දළදා මාලිගාවේ සිට මෙම පෙරහැර වීදි සංචාරය ආරම්භ කිරීමට නියමිත අතර, එය දළදා වීදිය, යටිනුවර වීදිය සහ රජ වීදිය ඔස්සේ ගමන් කෙරේ. මෙම පෙරහැර පැවැත්වෙන්නේ ජනාධිපති රනිල් විකරමසිංහගේ විශේෂ ඉල්ලීමක් මත ය.
දළදා මාලිගාවේ ප්රකාශකයෙකු පැවසුවේ මෙම පෙරහැර සඳහා අලි – ඇතුන් 45ත් – 50ත් අතර සංඛ්යාවක් සහභාගි වනු ඇති බවයි. වාර්ෂිකව පවත්වන ඇසළ පෙරහර මංගල්යයේ අවසාන රන්දෝලි පෙරහැර ආකාරයට ම මෙම පෙරහැර විචිත්රවත් ව වීදි සංචාරය කරන බව ද අදාළ ප්රකාශකයා පැවසීය.
මේ සඳහා ඇමතිවරුන්, තානාපතිවරුන්, අමාත්යංශ ලේකම්වරුන් ඇතුළු විශාල පිරිසක් සහභාගී වීමට නියමිත ය. මහනුවර අවට සංචාරක හෝටල් රැසක මෙම පිරිස ඊයේ (18) සිට නවාතැන් ගෙන සිටී.
thetime.lk කර්තෘ මණ්ඩල මතය :
රට තුළ ඇති වී තිබෙන බරපතළ මූල්ය අර්බුදය හේතුවෙන් මේ වන විට රෝහල්වල ඖෂධ නොමැති වීම ඇතුළු ගැටළු රැසකට ජනතාව මුහුණ දෙමින් සිටී. එවැනි අවස්ථාවක මෙවැනි වියදමක් දරමින් විශේෂ පෙරහරක් පැවැත්වීම ගැටළු සහගත ය.
උසස් පෙළ සිසුන්ට විදුලිය ලබාදීම දුෂ්කර බව පවසමින් අඛණ්ඩව විදුලිය ලබානොදුන් වර්තමාන ආණ්ඩුව, විදුලි බිල වැඩි කිරීමෙන් පසු අඛණ්ඩව විදුලිය සපයමින් සිටී. ඒ අතර මෙම පෙරහැර විචිත්රවත් කිරීම සඳහා දැවැන්ත විදුලි ධාරිතාවක් වැය කිරීමට අපේක්ෂිත ය.
පෙරහැර සංස්කෘතික අංගය මෙරට ඇති විචිත්රවත් අංගයකි. එහෙත් ජනතාව මහත් දුෂ්කරතා හමුවේ, ජීවත් වීම සඳහා බරපතළ අරගලයක යෙදී සිටින තත්ත්වයක, එවැනි විචිත්රවත් සංස්කෘතිකාංගයක් විඳගැනීමට ජනතාවට හැකි ද යන්න බරපතළ ගැටළුවකි.
එසේ ම වියදම් කළ යුතු මූලිකත්වය අනුව ගත් විට, මෙවැනි වියදමක් මේ මොහොතේ අනවශ්ය වියදමක් බව පැහැදිලි ව අවධාරණය කළ යුතුය.