පවතින ආර්ථික අර්බුදය නිසා පළාත් පාලන මැතිවරණය සඳහා අවශ්‍ය මුදල් ලබාදීමේ ගැටළුවක් පවතින බව මුදල් අමාත්‍යාංශ ලේකම් මහින්ද සිරිවර්ධන අද (17) මැතිවරණ කොමිසමට නිල වශයෙන් දැනුම් දී තිබේ.
මැතිවරණ කොමිසමේ සභාපති නීතිඥ නිමල් පුංචිහේවා පැවසුවේ මුදල් අමාත්‍යාංශ ලේකම්වරයා සහ එහි ඉහළ නිලධාරීන් මැතිවරණ කොමිසම හමුවට කැඳවූ අවස්ථාවේ ඔවුන් මෙසේ ප්‍රකාශ කළ බවයි. රජයේ වියදම් සීමාකරමින් නිකුත් කර ඇති චක්‍රලේඛය අනුව රටේ අත්‍යවශ්‍ය සේවා සඳහා පමණක් මුදල් වෙන්කිරීමට සිදුව ඇති බව ඔවුන් කොමිසමට දැනුම් දී ඇත.
වෙනත් අත්‍යවශ්‍ය නොවන වියදම් සඳහා රටේ මුදල් ඇමතිවරයාගේ අනුමැතිය ලබාගත යුතු යැයි තවත් චක්‍රලේඛයක් නිකුත් කර ඇති බව ද මුදල් අමාත්‍යාංශ නිලධාරීන් එහිදී වැඩිදුරටත් සඳහන් කර තිබේ.
මුදල් ඇමතිවරයා ලෙස රනිල් වික්‍රමසිංහ විසින් කැබිනට් මණ්ඩලයට ඉදිරිපත් කළ යෝජනාවක දැක්වුණේ අත්‍යවශ්‍ය සේවා සඳහා මුදල් වෙන්කිරීමට තීරණය කිරීම සම්බන්ධයෙනි. ඊට කැබිනට් මණ්ඩලයේ අනුමැතිය හිමි විය.