පන්දුවාර 20යි 20 ලෝක කුසලාන ක්රිකට් තරගාවලියේ තීරණාත්මක පකිස්ථාන – දකුණු අප්රිකා තරගය අද (03) පැවැත්වේ.
ඔස්ට්රේලියාවේ සිඩ්නිහිදී පැවැත්වෙන තරගය මෙරට වේලාවෙන් පස්වරු 1.30ට ආරම්භ වීමට නියමිතය.
තරගාවලියේ සුපිරි 12 දෙනාගේ වටයේ දෙවැනි කාණ්ඩයෙන් මෙම තරගය පැවැත්වේ.
කණ්ඩායම් දෙකම මේ වනවිට දෙවැනි කාණ්ඩයේ තරග 3 බැගින් ක්රීඩා කර අවසන් ය.
සහභාගී වූ තරග 3 න් 2 ක් ජය ගත් දකුණු අප්රිකාවට එම කාණ්ඩයේ ලකුණු සටහනේ දෙවැනි ස්ථානය හිමිව තිබේ.
ඒ, ලකුණු 5ක් ද සමගිනි.
පකිස්ථානයට දෙවැනි කාණ්ඩයේ ජය ගැනීමට හැකි වූයේ එක් තරගයක් පමණි.
ඔවුන් තරග 2කින් පරාජය වීම නිසා ලකුණු සටහනේ 5 වැනි ස්ථානයේ පසු වෙයි.
ඔවුන්ට හිමිව ඇත්තේ, ලකුණු 2ක් පමණි.
දකුණු අප්රිකාව මෙම තරගය ජය ගැනීමට සමත් වුවහොත් ඔවුන්ට තරගාවලියේ අවසන් පූර්ව වටයේ ස්ථානය තහවුරු වේ.
ඔවුන් සුපිරි 12 දෙනාගේ වටයේ අපරාජිත කණ්ඩායම වන නමුත් ලකුණු සටහනේ දෙවැනි ස්ථානයට පත්ව ඇත්තේ, සිම්බාබ්වේ කණ්ඩායමට එරෙහි තරගය වර්ෂාවෙන් බාධා එල්ල වීම නිසා දෙපිලටම එක් ලකුණ බැගින් හිමි වීම හේතුවෙනි.
කෙසේ නමුත් අවසන් වරට දකුණු අප්රිකාවට එරෙහිව සහභාගී වූ තරග 2ම ජය ගෙන තිබීම පකිස්ථානයට ද වාසිදායක තත්ත්වයක් බව ක්රිකට් විචාරකයින් පෙන්වා දෙයි.
මේ අතර දකුණු අප්රිකා කණ්ඩායමෙන් ලැබෙන වාර්තා පවසන්නේ, ඔවුන්ගේ පිතිකරු ලැයිස්තුවේ වෙනසක් සිදු නොවිය හැකි නමුත් පන්දු යවන්නන්ගේ කිසියම් වෙනසක් සිදු විය හැකි බවයි.
පකිස්ථාන ක්රීඩක ෆකර් සමාන් ආබාධයකට ලක් වී ඇති බැවින් එම කණ්ඩායමේ වෙනසක් අපේක්ෂා කෙරෙනු ඇත.
මේ අතර පකිස්ථාන කණ්ඩායමේ නසීම් ෂා පවසන්නේ, ඉන්දීය කණ්ඩායමට එරෙහි තරගය පරාජය වුවද වෘත්තීය ක්රීඩකයින්ගෙන් සමන්විත තම කණ්ඩායම ඉදිරි තරගවලදී දක්ෂතා අතරට පිවිසීමේ අපේක්ෂාවෙන් පසුවන බවයි.