බටහිර ඉන්දීය කොදෙව් කාන්තාවෝ පන්දුවාර 20 ජාත්‍යන්තර ක්‍රිකට් තරගවල 15 වන අඛණ්ඩ පරාජය ලබති. දකුණු අප්‍රිකාවේ පැවැත්වෙන ලෝක කුසලාන T 20 කාන්තා ක්‍රිකට් තරගාවලියේ දී කොදෙව්වන් පරාජයට ඉන්දීය ක්‍රීඩිකාවෝ සමත්වූහ.
නිව්ලන්ඩ්ස් හි මදක් ශීත සහ මද සුළඟක් සහිත ක්‍රීඩා පිටියේ දඟ පන්දු යවන්නියන් පස්දෙනෙකු යොදා ගනිමින් කොදෙව්වන් ලකුණු 118 කට සීමා කිරීමට ඉන්දියාව සමත්විය. පන්දු 11 ක් ඉතිරිව තිබියදී, කඩුළු 4 ක් පමණක් දැවී තරගය ජය ගැනීමට ඉන්දීය ක්‍රීඩිකාවෝ සමත්වූහ. එය ඔවුන් කොදෙව්වන්ට එරෙහිව වාර්තා කළ 8 වන අඛණ්ඩ T 20 ජයයි.
මේ අතර, පාකිස්ථානය අයර්ලන්තයට එරෙහි ජයක් වාර්තා කිරීමට සමත්විය. එහිදී මෙම ලෝක කුසලාන ක්‍රිකට් තරගාවලියේ ප්‍රථම ශතකය වාර්තා කිරීමට පාකිස්ථාන ආරම්භක පිතිකාරිනී මුනීබා අලි සමත්වූවාය. ඇය රැස්කළ ලකුණු සංඛ්‍යාව 102 කි. පාකිස්ථානය ලබාගත් ලකුණු 165 ට එරෙහිව අයර්ලන්තයට ලබාගත හැකි වූයේ සියලු ක්‍රීඩිකාවන් දැවී ලකුණු 95 ක් පමණි.
ලෝක කුසලාන ක්‍රිකට් තරගාවලියේ ශ්‍රී ලංකාව සහ ලෝක ශූර ඔස්ට්‍රේලියාව අතර තරගය පස්වරු 6:30 ට ඇරඹෙයි. ශ්‍රී ලංකාව තරගය ජයගතහොත්, මුලින්ම අවසන් පූර්ව තරග සඳහා සුදුසුකම් ලැබීමේ අවස්ථාව ශ්‍රී ලංකාවට හිමිවෙයි.