අද (15) සිට 66%කින් විදුලි ගාස්තු ඉහළ නැංවීමට මහජන උපයෝගීතා කොමිසමේ බහුතරයේ අනුමැතිය හිමිවී තිබේ.
කැබිනට් මණ්ඩලය අනුමත කළ 66%කින් විදුලි ගාස්තු ඉහළ නැංවීමේ යෝජනාව ජනවාරි 02 වනදා මහජන උපයෝගීතා කොමිසමට යොමු කෙරුණි.
ඒ සඳහා මහජන උපයෝගීතා කොමිසමේ අනුමැතිය දිගින් දිගටම හිමි නොවු අතර, එහි සාමාජිකයින් කිහිප දෙනෙකුම මතගැටුම් මැද ඉල්ලා අස් විය.
මේ අතර 36%ක විදුලි ගාස්තු වැඩි කිරීමක් සඳහා මහජන උපයෝගිතා කොමිසම යෝජනාවක් ඉදිරිපත් කළ අතර, එය සභාපතිවරයා විසින් ඊයේ (14) කොමිසමේ අනුමැතිය සඳහා ඉදිරිපත් කළේය.
සභාපතිවරයා ඊට අනුමැතිය ලබාදුන්න ද, සෙසු සාමාජිකයින් තිදෙනා වන ඩග්ලස් නානායක්කාර, නීතිඥ චතුරිකා විජේසිංහ, සහ එස්. ජී. සේනාරත්න විරෝධය පළ කිරීම නිසා එය ප්රතික්ෂේප විය.
පසුව 66%කින් විදුලි ගාස්තු ඉහළ නැංවීමට අදාළ යෝජනාව කොමිසමේ බහුතර අනුමැතිව හිමිවිය.
කෙසේවෙතත් මෙම නව විදුලි ගාස්තු සංශෝධනය සම්බන්ධයෙන් ලංකා විදුලිබල මණ්ඩල වෘත්තීය සමිති සන්ධානය ඇතුළු පාර්ශ්ව කිහිපයක් සිය විරෝධය පළ කර තිබේ.
ලංකා විදුලිබල මණ්ඩල වෘත්තීය සමිති සන්ධානයේ කැඳවුම්කරු රංජන් ජයලාල් සඳහන් කළේ, මේ සම්බන්ධයෙන් ජනතාවද විරෝධය පළ කළ යුතු බවයි.
මේ අතර පසුගිය 2022 (අගෝස්තු 10 වැනිදා) 264%ත් 75%ත් අතර වූ අගයකින් විදුලි ගාස්තුව ඉහළ දැමිණි.