රජයේ මුද්‍රණාලයාධිපති ගංගානි ලියනගේ ජනාධිපති මන්දිරයට කැඳවූ බවට වාර්තා වී ඇතැයි ජාතික ජන බලවේගයේ දේශපාලන මණ්ඩල සභික, හිටපු පාර්ලිමේන්තු මන්ත්‍රී සුනිල් හඳුන්නෙත්ති අවධාරණය කරයි.
එසේ කැඳවූයේ පළාත් පාලන මැතිවරණයට අදාළ ව රජයේ මුද්‍රණාලයේ මුද්‍රණය කෙරෙමින් පැවති ඡන්ද පත්‍රිකා සම්බන්ධයෙන් බලපෑම් කිරීමට බවට සැක මතු වෙතැයි ද ඔහු සඳහන් කළේය.
හිටපු පාර්ලිමේන්තු මන්ත්‍රීවරයා මේ අදහස් පළකළේ අද (14) බත්තරමුල්ල, පැලවත්තේ පිහිටි ජනතා විමුක්ති පෙරමුණේ ප්‍රධාන කාර්‍යාලයේ පැවති මාධ්‍ය හමුවකදී ය.
රජයේ මුද්‍රණාලයාධිපතිනිය විසින් තැපැල් ඡන්ද පත්‍රිකා මුද්‍රණය කළ නොහැකි බවට මැතිවරණ කොමිසමට කළ දැනුම් දීම සම්බන්ධයෙන් අදහස් දක්වමින් ඔහු එහිදී මෙසේ ද පැවසීය.
‘රාජ්‍ය නිලධාරියෙක් හැටියට රජයේ මුද්‍රණාලයාධිපතිතුමිය ජනතාව වෙනුවෙන් කටයුතු කළ යුතුයි. මේ වෙලාවේ මුළු රටක් ම බලාපොරොත්තුව ඉන්නවා, මේ පළාත් පාලන මැතිවරණය ඉතා ඉක්මනින් නියමිත පරිදි පවත්වයි කියලා. ශ්‍රේෂ්ඨාධිකරණය ඒ සඳහා අවශ්‍ය කරන අවකාශය ලබාදී තිබෙනවා මැතිවරණ කොමිසමට.
ඒ නිසා දැන් රජයේ මුද්‍රණාලය කළ යුතුව තිබෙන්නේ මැතිවරණ කොමිසමේ අවශ්‍යතාව අනුව කටයුතු කිරීමයි. මැතිවරණ කොමිසමේ කටයුතුවලට බාධා වන ආකාරයට කටයුතු කිරීම දඬුවම් ලැබිය හැකි වරදක්. අපට ආරංචි හැටියට රජයේ මුද්‍රණාලයාධිපතිතුමියව ජනාධිපති මන්දිරයට කැඳවා තිබෙනවා. කැඳවා කරපු බලපෑමක් මෙය. හිටපු මැතිවරණ කොමසාරිස්වරයෙක් අවසානයේ කියා සිටියා ඔහු ආතතියට ලක්වෙලා තිබුණු බව.
මේ මුද්‍රණාලයාධිපතිතුමියත් එහෙම ආතතියට ලක්වෙලාද දන්නේ නැහැ. ඒ කෙසේ වුවත් එතුමිය වගකිව යුත්තේ මේ රටේ ජනතාවට. එතුමිය පඩි ලබන්නේ මේ රටේ ජනතාවගෙන්. එතුමියට සේවයෙන් ඉවත්වෙන්න වන කාලයකදී, ජනතාව ඉදිරියේ අවමානයට, ලැජ්ජාවට, අපකීර්තියට පත්වෙලා ඉවත් වෙනවට වඩා හොඳයි නීතියට අනුව කටයුතු කිරීම.
මේ මැතිවරණයට වැඩිම වියදම දරා අවසන්. මුද්‍රණ කටයුතු ආරම්භ කර, අතරමැදදී නවත්වනවා කියන්නේ අනිවාර්යයෙන් බලපෑමකට ලක්වෙලා තිබෙනවා. අපි එතුමියට කියනවා බලපෑම්වලට යට නොවී ජනතාව වෙනුවෙන් කටයුතු කරන ලෙස. අපි මැතිවරණ කොමිසමෙන් ඉල්ලා සිටිනවා, එතුමිය කැඳවා අනිවාර්යයෙන් මේ පිළිබඳව ප්‍රශ්න කරන්න. අපි සොයා බැලුවා මුද්‍රණාලයේ අනෙකුත් මුද්‍රණ කටයුතු කිසිවක් නවතා නැහැ. මැතිවරණයට බැලට් පේපර්ස් තිබෙනවා. ප්‍රින්ට් කරන්න විතරයි තිබෙන්නේ. තීන්ත තිබෙනවා. විශේෂ කාර්ය මණ්ඩලයක් සිටිනවා. ඒ අයගේ අමතර දීමනා ගෙවන්නේ පස්සේ. මාසෙ වැටුප කොහොමත් ගෙවනවා. අතිකාල දීමනා ගෙවනවා. එසේ නම් ඡන්ද පත්‍රිකා මුද්‍රණ කටයුතු කිරීම පමණක් නතර වෙන්න කිසිම හේතුවක් නැහැ. මෙතන තිබෙන්නේ බලපෑමක්.’