නව වාර්තා කිහිපයක් තබමින් බංග්ලාදේශය සමග පැවති ලෝක කුසලාන T 20 ක්රිකට් තරගය ශ්රී ලංකා ක්රීඩිකාවෝ ජය ගනිති. ඒ සමග පළමු කාණ්ඩයේ ඉදිරියෙන් සිටින්නේ ශ්රී ලංකාව යි. ඉතිරි තරග දෙකෙන් එකක් ජයගතහොත්, අවසන් පූර්ව තරගවලට පිවිසීමේ වැඩි අවස්ථාවක් ශ්රී ලංකාවට විවර වෙයි. බංග්ලාදේශ කණ්ඩායම මුලින් පන්දුවට පහරදී ලකුණු 126 ක් ලබා ගැනීමට සමත්විය. කඩුළු 8 ක් බිඳ වැටිණ. සොබානා මොස්ටරි ලකුණු 29 යි. ඕෂධී රණසිංහ ලකුණු 23 කට කඩුළු 3 ක් බිඳ හෙලීමට සමත්වූවාය. පන්දු 10 ක් ඉතිරිව තිබියදී කඩුළු 7 කින් තරගය ජය ගැනීමට ශ්රී ලංකා ක්රීඩිකාවෝ සමත් වූහ.
මරූෆා අක්තර් ගේ පන්දු යැවීම ඉදිරියේ ලකුණු 25 කදී චමරි අතපත්තු, විශ්මි ගුණරත්න සහ අනුෂ්කා සංජීවනී දැවී ගියහ. ඉන් විශ්මි හා අනුෂ්කා පිට පිට පන්දු දෙකක දී දවාගැනීමට මරූෆා සමත්වූවාය. ඉන්පසු පිටියේ එක්වූ නිලක්ෂි ද සිල්වා සහ ආරම්භක පිතිකාරිනී හර්ෂිතා මාධවී තරගය ජය වෙත රැගෙන ගියහ. පන්දු 50 කදී නොදැවී ලකුණු 69 ක් හර්ෂිතා රැස් කළාය. හතරේ පහර 8 ක් හා හයේ පහරක් ඇගේ ඉනිමට ඇතුළත් විය. එය ශ්රී ලංකා ක්රීඩිකාවක් T 20 ලෝක කුසලාන තරගාවලියක රැස් කළ වැඩිම ලකුණු සංඛ්යාවයි. නිලක්ෂි ලකුණු 41 ක් නොදැවී රැස් කළ අතර වැයවූ පන්දු සංඛ්යාව 38 කි. ඔවුන් දෙදෙනා අතර තරගය ජය වෙත රැගෙන ගිය සම්බන්ධතාව ලකුණු 104 කි. පන්දු 79 ක් ඊට වැය කෙරිණ. එය T 20 ලෝක කුසලාන ක්රිකට් තරගාවලියකදී ශ්රි ලංකා කාන්තාවන් ඕනෑම කඩුල්ලක් සඳහා වාර්තා කළ හොඳම සම්බන්ධතාවයි. කාන්තා T 20 ලෝක කුසලාන තරගාවලියක දී වාර්තා වූ පළමු ශතක සම්බන්ධතාව ද එයයි.
ආරම්භක පිතිකාරිනී හර්ෂිතා මාධවී තරගයේ වීරයා ලෙස නම් කෙරිණි. ශ්රී ලංකා නායිකා චමරි අතපත්තු කියාසිටියේ කණ්ඩායමට ප්රබල පිතිකාරිනියන් හයදෙනෙකු ඇතුළත් බවයි. ඒ නිසා මුල් කඩුළු අඩු ලකුණු සංඛ්යාවකදී බිඳවැටීම ගැටලුවක් නොවීය. කණ්ඩායමක් ලෙස ශ්රී ලංකාව දස්කම් දක්වන බවද ඇගේ අදහසයි.
T 20 ලෝක කුසලාන තරගාවලියකදී ශ්රී ලංකාව තරග දෙකක් පිට පිට ජයගත් පළමු අවස්ථාවද මෙයයි. ශ්රී ලංකාවේ මීලඟ තරගය ඔස්ට්රේලියාවට එරෙහිවයි. එය ලබන බ්රහස්පතින්දා සවස 6:30 ට ආරම්භ වෙයි.