සැලසුම් කර ඇති පරිදි පළාත් පාලන මැතිවරණය පැවැත්වීමට ශ්රේෂ්ඨාධිකරණය විසින් මැතිවරණ කොමිෂන් සභාවට අවසර ලබාදී තිබේ.
පළාත් පාලන ඡන්ද විමසීම පැවැත්වීමට පියවර ගන්නා ලෙස මැතිවරණ කොමිසමට නියෝගයක් නිකුත් කරන ලෙස පාර්ලිමේන්තු මන්ත්රීවරුන් පිරිසක් ගොනුකළ රීට් පෙත්සම් 02ක් අද (10) කැඳවිණි. එහිදී මැතිවරණ කොමිෂන් සභාව වෙනුවෙන් පෙනී සිටි ජනාධිපති නීතිඥ සාලිය පීරිස් අධිකරණයට ප්රතිඥාවක් ලබාදෙමින් සඳහන් කළේ පළාත් පාලන මැතිවරණය පැවැත්වීමට කොමිසම පියවර ගන්නා බවයි.
මෙම ප්රතිඥාව සම්බන්ධයෙන් සෑහීමට පත්වන බව පෙත්සම්කාර පාර්ශ්වය වෙනුවෙන් පෙනී සිටි ජනාධිපති නීතිඥ රොමේෂ් ද සිල්වා සහ ජනාධිපති නීතිඥ සංජීව ජයවර්ධන අධිකරණයට දැනුම් දුන්හ.
ඉන්පසු ශ්රේෂ්ඨාධිකරණය මගින් එම පෙත්සම් විභාගය අවසන් කරන ලදි. එස්. තුරෙයිරාජා, ඒ.එච්.ඩි. නවාස් සහ ශිරාන් ගුණරත්න යන විනිසුරුවරුන් මෙම පෙත්සම් සලකා බැලූහ.
මේ අතර යුද හමුදාවේ විශ්රාමික කර්නල් ඩබ්ලිව්.එම්.ආර්.විජේසුන්දර විසින් මැතිවරණයට අදාළ සියලු කටයුතු වැලැක්වීමේ නියෝගයක් නිකුත් කරන ලෙස ඉල්ලා ගොනු කළ පෙත්සම ලබන 23දා විභාගයට ගැනීමට ද ශ්රේෂ්ඨාධිකරණය තීන්දු කළේය. පළාත් පාලන මැතිවරණයට අදාළ තැපැල් ඡන්ද කටයුතු ලබන 22දා ආරම්භ කිරීමට නියමිත ය.