වයඹ පළාත් ආණ්ඩුකාර වසන්ත කරන්නාගොඩගේ ජීවිතයට තර්ජනයක් වන ආකාරයෙන් රහසිගත වීඩියෝ දර්ශන ලබාගැනීමේ සිද්ධියක් සම්බන්ධයෙන් පොලිස්පතිවරයාට පැමිණිල්ලක් ලැබී තිබේ.
මේ පිළිබඳ විමර්ශනයක් පවත්වන ලෙස පොලිස්පතිවරයා විසින් අපරාධ පරීක්ෂණ දෙපාර්තමේන්තුවට නියෝග කර ඇත.
ආණ්ඩුකාරවරයාගේ කුරුණෑගල වැව රවුමේ පිහිටි නිල නිවස, කුරුණෑගල නගරයේ පිහිටා ඇති ආණ්ඩුකාර කාර්යාලයේ සිට නිල නිවස වෙත ගමන් ගන්නා මාර්ගය මෙන්ම පෙර ගමන් රථය කිසියම් පිරිසක් විසින් වීඩියෝ ගත කර ඇතැයි පැමිණිල්ලේ සඳහන් බව වාර්තා වේ. එසේ වීඩියෝ ගත කළ දර්ශන කිසියම් අයෙකු විසින් ආණ්ඩුකාරවරයා වෙත ලබාදී ඇති බව ද සඳහන් ය.
වාර්තා වන ආකාරයට ආණ්ඩුකාර නිල නිවසට අදාළ වීඩියෝ දර්ශන ලබාගෙන ඇතැයි සඳහන් කර ඇත්තේ ඊට යාබද ව පිහිටා ඇති කුරුණෑගල කොට්ඨාස බාර ජ්‍යෙෂ්ඨ පොලිස් අධිකාරිවරයාට අයත් නිල නිවසේ සිට ය. තමන් නිල නිවසේ නොමැති අවස්ථාවක කිසියම් අයෙකු විසින් මෙම දර්ශන ලබාගෙන ඇති බව කුරුණෑගල ජ්‍යෙෂ්ඨ පොලිස් අධිකාරි උපුල් චන්දන අබේසිංහ ආණ්ඩුකාරවරයාට දැනුම් දී තිබේ.
මෙම සිද්ධිය සම්බන්ධයෙන් කඩිනම් විමර්ශනයක් සිදුකරන ලෙස කුරුණෑගල ජ්‍යෙෂ්ඨ පොලිස් අධිකාරිවරයාට දැනුම් දුන්නද, එය මන්දගාමීව සිදුවීම හේතුවෙන් මෙසේ පොලිස්පතිවරයා වෙත පැමිණිල්ලක් කරණ බව ආණ්ඩුකාරවරයා සඳහන් කර තිබේ.
අදාළ තත්ත්වය සලකා වයඹ පළාත් ආණ්ඩුකාරවරයාට ලබාදී ඇති ආරක්ෂාව ද මේ වන විට වැඩිකර ඇත.