ඇතැම් රෝහල්වල පැරසිටමෝල් පවා දැඩි හිඟයක් පවතින බව රජයේ වෛද්‍ය නිලධාරීන්ගේ සංගමය පවසයි.
සාමාන්‍යයෙන් රෝගීන්ට ප්‍රතිකාර සඳහා ඖෂධ වර්ග 1300කට අධික ප්‍රමාණයක් මෙරට තුළ භාවිත කෙරෙන අතර ඒ අතර පවතින ඖෂධ වර්ග 383 ක් අත්‍යවශ්‍ය ඖෂධ ලෙස සලකනු ලබයි.
මේ වනවිට රටතුළ එවැනි ඖෂධ වර්ග 160 ක පමණ ප්‍රමාණයක හිඟයක් පවතින බව රජයේ වෛද්‍යවරුන්ගේ සංගමය වැඩිදුරත් පෙන්වාදෙයි.
මේ අතර කරාපිටිය ශික්‍ෂණ රෝහලේ නේවාසික හා බාහිර රෝගීන්ට අවශ්‍ය ප්‍රතිජීවක ඖෂධ විශාල ප්‍රමාණයක හිඟයක් පවතින බව රෝහල් අරංචි මාර්ග පවසයි.
ඒ හේතුවෙන් බාහිර රෝගී අංශයෙන් ප්‍රතිකාර ගැනීම සඳහා දිනකට දහසකට අධික රෝගීන් සංඛ්‍යාවක් දැඩි අපහසුදාවයකට පත්ව ඇති අතර ඔවුනට ආරක්ෂිතව ඖෂධ ලබා දීමට කවර පවා නොමැති බව සඳහන් වේ.
බෙහෙත් දැමීම සඳහා කවර නැති බවට දැන්වීමක් ද රෝහලේ අලවා ඇත. එක් දහස් පන්සියයකට ආසන්න රෝගීන් සංඛ්‍යාවක් නේවාසිකව සිටින අතර ඔවුන්ගේ ඊ.සී.ජී. පරික්ෂණ දත්ත ලබා ගැනීම සඳහා අවශ්‍ය කඩදාසි පටිවල පවා හිඟයක් පවතී.