මැතිවරණ වියදම් සීමා කිරීමේ නව පනතට අනුව වෙනස් ම සහ ජනතාවට වඩාත් දැනෙන ආකාරයේ මැතිවරණ ප්‍රචාරක වැඩසටහනක් ක්‍රියාත්මක කිරීමට අද (02) ශ්‍රී ලංකා පොදුජන පෙරමුණ තීරණය කළ බව එහි මහ ලේකම්, පාර්ලිමේන්තු මන්ත්‍රී සාගර කාරියවසම් thetime.lk වෙත පැවසීය.
බත්තරමුල්ල, නෙළුම් මාවතේ පිහිටි එම පෙරමුණේ මූලස්ථානයට අද පෙරවරුවේ ආසන සංවිධායකවරුන් සහ පාර්ලිමේන්තු මන්ත්‍රීවරුන් කැඳවා තිබිණි.
බැසිල් රාජපක්ෂ හිටපු ඇමතිවරයාගේ ප්‍රධානත්වයෙන් පැවති මෙම රැස්වීමේදී සියලුම ආසන සංවිධායකවරුන්ට මැතිවරණයට අදාළ විශේෂ උපදෙස් රැසක් ලබාදුන් බවත්, වෙනස් සහ ජනතාවට දැනෙන ප්‍රචාරක ව්‍යාපාරයක් මෙම මැතිවරණයේදී සිදුකිරීම තම පෙරමුණේ අරමුණ බවත් මහ ලේකම්වරයා වැඩිදුරටත් සඳහන් කළේය.
ඉදිරි පළාත් පාලන මැතිවරණයේදී තම පෙරමුණට ජනතාව ළඟට යෑමේ කිසිදු ප්‍රශ්නයක් නැති බවත්, ඇතැම් පක්ෂ එවැනි මතයක් ඇති කරන්නට උත්සාහ කරණ බවත් පැවසූ මහ ලේකම්වරයා, රටේ පවතින ආර්ථික තත්ත්වය තේරුම් ගනිමින් ප්‍රචාරක කටයුතු කරන ලෙස ආසන සංවිධායකවරුන්ට උපදෙස් දුන් බව ද සඳහන් කළේය.