ආණ්ඩුක්‍රම ව්‍යවස්ථා සභාව ඊයේ (30) කතානායක සහ ආණ්ඩුක්‍රම ව්‍යවස්ථා සභාවේ සභාපති මහින්ද යාපා අබේවර්ධනගේ ප්‍රධානත්වයෙන් පැවැත්විණි.
එහිදී ඉහළ අධිකරණවල පුරප්පාඩු වී ඇති විනිසුරුවරුන් පත්කිරීම සම්බන්ධයෙන් අවසාන තීරණ කිහිපයක් ගෙන ඇති අතර, ඉදිරියේදී ස්වාධීන කොමිෂන් සභා සාමාජිකයන් පත්කිරීම සම්බන්ධයෙන් කඩිනමින් කටයුතු කිරීම පිළිබඳව ද සාකච්ඡා කර තිබේ.
ශ්‍රේෂ්ඨාධිකරණ විනිසුරු එල්.ටී.බී. දෙහිදෙනිය විශ්‍රාම යෑමෙන් පුරප්පාඩු වූ විනිසුරු ධුරයට අභියාචනාධිකරණයේ සභාපති විනිසුරු එම්.කේ.පී. ප්‍රනාන්දු පත්කිරීමට සභාවේ අනුමැතිය ලැබී ඇත. මේ සම්බන්ධයෙන් ජනාධිපතිවරයා කළ නිර්දේශයට ආණ්ඩුක්‍රම ව්‍යවස්ථා සභාවේ ඒකමතික අනුමැතිය හිමිවූ බව වාර්තා වේ.
එම පත්කිරීම නිසා පුරප්පාඩු වන අභියාචනාධිකරණයේ සභාපති විනිසුරු ලෙස එන්.බී.පී.ඩී.එස්. කරුණාරත්න පත්කිරීමටත්, මහාධිකරණ විනිසුරු එම්.ඒ.ආර්. මරික්කාර් අභියාචනාධිකරණ විනිසුරුවරයෙකු ලෙස පත්කිරීමටත් ආණ්ඩුක්‍රම ව්‍යවස්ථා සභාවේ ඒකමතික අනුමැතිය හිමිවී ඇත.
මේ අතර ස්වාධීන කොමිෂන් සභා සාමාජිකයන් පත්කිරීම සඳහා අයදුම්පත් කැඳවීමේ පුවත්පත් නිවේදන පෙබරවාරි 01දා පළකිරීමටත්, ඒ සඳහා වන අවසාන දිනය පෙබරවාරි 15 ලෙසත් මෙම රැස්වීමේදී තීරණය කර තිබේ. මීට අදාළ අයදුම්පත් ආකෘතිය පාර්ලිමේන්තු නිල වෙබ් අඩවියේ පළකිරීමට නියමිත ය.
මෙම රැස්වීමට අගමැති දිනේෂ් ගුණවර්ධන, විපක්ෂ නායක සජිත් ප්‍රේමදාස, ඇමති නිමල් සිරිපාල ද සිල්වා, පාර්ලිමේන්තු මන්ත්‍රී සාගර කාරියවසම් මෙන්ම මන්ත්‍රීවරුන් නොවන සාමාජිකයන් වන ආචාර්ය ප්‍රතාප් රාමනුජම්, වෛද්‍ය දිල්කුෂි අනුලා විජේසුන්දර සහ ආචාර්ය දිනේෂා සමරරත්න සහභාගි වී තිබේ.