ශ්‍රී ලංකා කාන්තා ක්‍රිකට් පිලේ පළමු නායිකාව වන වැනේසා ද සිල්වා ලෝක කුසලාන අවසන් තරගයක තරග තීරක ලෙස කටයුතු කළ පළමු ශ්‍රී ලාංකික කාන්තාව ලෙස ඉතිහාසයට එක් වූවාය.
ඒ වයස අවුරුදු 19න් පහළ කාන්තා ලෝක කුසලාන තරගාවලියේ ඊයේ (29) රාත්‍රී පැවති ඉන්දීය- එංගලන්ත අවසන් මහා තරගයේ තරග තීරකවරිය ලෙස කටයුතු කරමිනි.
කෝල්ට්ස් ක්‍රීඩා සමාජය වෙනුවෙන් පලමු පෙළ ක්‍රීඩා කළ වැනේසා ජාත්‍යන්තර තරග 14 සහභාගි වී ඇත.
ඇය එක්දින තරග 13 කදීී සහ ටෙස්ට් තරග 1, කදී ශ්‍රී ලංකාව නියෝජනය කළාය.
තමන් සහභාගි වුණ එකම ටෙස්ට් තරගයේදී පළමු ඉනිමේදී ලකුණු 78ක් සහ දෙවැනි ඉනිමේදී ලකුණු 63ක් රැස්කරමින් මංගල ටෙස්ට් තරගයේදීම ද්විත්ව අර්ධ ශතක රැස්කළ පළමු සහ එකම ශ්‍රී ලංකා කාන්තා ක්‍රීඩිකාව වන්නේද වැනේසාය.
එමෙන්ම වැනේසා පසුගිය වසරේ පැවති කාන්තා ආසියානු කුසලාන තරගාවලියේදී ද තරග තීරකවරියක ලෙස කටයුතු කළාය.
මේ අතර හිටපු ක්‍රීඩිකාවක වන දේදුණු ද සිල්වා මෙම අවසන් මහා තරගයේ රූපවාහිනී විනිසුරුවරිය ලෙස කටයුතු කළාය.
අයිසීසී ලෝක කුසලාන අවසන් මහා තරගයක දී ශ්‍රී ලාංකික කාන්තාවන් දෙදෙනකු තරග නිලධාරී මණ්ඩලයට එක් වූයේ ද පළමු වතාවද මෙය වෙයි.