ධුරයෙන් ඉල්ලා අස්වන්නැයි මැතිවරණ කොමිසමේ සාමාජික එම්.එම්. මොහොමඩ්ට මරණ තර්ජන එල්ල වී තිබේ.
මේ සම්බන්ධයෙන් නිට්ටඹුව පොලිසියට පැමිණිල්ලක් කර ඇති බව එම්.එම්. මොහොමඩ් සඳහන් කරයි.
072-948—— යන දුරකතන අංකයෙන් තමන්ට ඇමතුමක් ලබාදුන් පුද්ගලයෙකු මැතිවරණ කොමිෂන් සභාවෙන් ඉල්ලා අස්වන ලෙසට දැනුම්දෙමින් මරණ තර්ජන එල්ල කළ බව ද ඔහු වැඩිදුරටත් පවසයි.
ඔහුට මෙම තර්ජනාත්මක දුරකතන ඇමතුම ලැබෙන විට ඔහු රැඳී සිට ඇත්තේ නිට්ටඹුව, කහටෝවිට පිහිටි සිය නිවසේ ය.
විශ්‍රාමික නියෝජ්‍ය පොලිස්පතිවරයෙකු වන කේ.පී.පී. පතිරණ සහ සෙනෙවිරත්න බණ්ඩාර දිවාරත්න යන මැතිවරණ කොමිසමේ සාමාජිකයන් දෙදෙනාට ද පසුගිය 18දා මේ ආකාරයෙන් මරණ තර්ජන එල්ල වී තිබිණි.
ඒ සම්බන්ධයෙන් පාර්ලිමේන්තුව තුළ ද දැඩි කතාබහක් ඇති විය. ඒ සමග ම පොලිස්පතිවරයා විසින් එම තර්ජනය කිරීම් සම්බන්ධයෙන් විමර්ශන පැවැත්වීමේ වගකීම අපරාධ පරීක්ෂණ දෙපාර්තමේන්තුවට පවරනු ලැබීය. එම තර්ජනයට ලක්වූ කොමිසමේ සාමාජිකයන්ගේ ආරක්ෂාවට සන්නද්ධ පොලිස් නිලධාරීන් ද යොදවනු ලැබිණි.
මෙසේ තිබියදීත් කොමිසමේ තෙවැනි සාමාජිකයාටත් තර්ජන එල්ලවන්නේ අපරාධ පරීක්ෂණ දෙපාර්තමේන්තුව විසින් කරනු ලබන විමර්ශන ඔස්සේ කිසිදු සැකකරුවකු මෙතෙක් අත්අඩංගුවට ගැනීමට නොහැකිව තිබෙන පසුබිමක් තුළදී ය.