ශ්‍රී ලංකා ක්‍රිකට් ආයතනය විසින් ක්‍රිකට් තේරීම් කමිටුව පත් කිරීම සඳහා යෝජිත නම් ලැයිස්තුව ක්‍රීඩා අමාත්‍යාංශයේ ජාතික ක්‍රීඩා තේරීම් සභාව සම්පූර්ණයෙන්ම ප්‍රතික්ෂේප කර ඇතැයි ක්‍රිකට් ආරංචි මාර්ග සඳහන් කරයි.
පසුගිය දෙසැම්බර් මස 31 වැනිදායින් ජාතික ක්‍රිකට් තේරීම් කමිටුවේ නිල කාලසීමාව අවසන් වුණු අතර නව තේරීම් කමිටුවක් පත් කරගැනීමට සඳහා යෝජිත නම් ලැයිස්තුව ක්‍රීඩා අමාත්‍ය රොෂාන් රණසිංහට යොමු කර තිබිණි.
දසදෙනකුගේ නම් ලැයිස්තුවක් එලෙස යොමු කොට ඇති අතර ඊට වඩා සුදුසුකම් ඇති අපේක්ෂකයන් සිටින බවට පවසමින් අදාළ නම් ලැයිස්තුව ප්‍රතික්ෂේප කර ඇත.
ඒ බව ජාතික ක්‍රීඩා තේරීම් සභාව විසින් ක්‍රීඩා අමාත්‍යාංශයට ලිඛිතව දැනුම් දී ඇති බවද ශ්‍රී ලංකා ක්‍රිකට් ආරංචි මාර්ග පෙන්වාදෙයි.
දැනගන්නට ලැබෙන ආකාරයට ප්‍රමෝද්‍ය වික්‍රමසිගේ සභාපතිත්වයෙන් යුතු ක්‍රිකට් තේරීම් කමිටුවේ හිටපු සාමාජිකයන් සියලුදෙනාගේ නම් ඊට ඇතුළත්ව ඇත.
මේ අතර මෑතකදී පැවති රූපවාහිනී වැඩසටහනක් අතරතුර ප්‍රමෝද්‍ය වික්‍රමසිංහ චාමික කරුණාරත්න කණ්ඩායමට තෝරා නොගත් සිදුවීම පදනම් කරගෙන තමන් තේරීම් කමිටුවෙන් ඉවත් කිරීමට අමාත්‍යවරයාගේ සූදානමක් ඇති බවටද පවසා සිටියේය.