මෝටර් රථයක ගමන් කිරීමේදී ආසන පටි නොපැළඳීම හේතුවෙන් බ්‍රිතාන්‍ය අගමැති රිෂි සුනක්ට පොලිසිය විසින් දඩ නියම කර තිබේ.
සිය මෝටර් රථය ධාවනය වෙමින් තිබියදී ඔහු විසින් එහි පිටුපස අසුනේ සිට තම ඉන්ස්ටග්‍රෑම් ගිණුම සඳහා වීඩියෝවක් රූගත කර මුදා හැර ඇති අතර, එම අවස්ථාවේදී ඔහු ආසන පටි නොපැළඳ සිටි බවට අදාළ වීඩියෝවේ රූප රාමුවලින් අනාවරණය වී ඇත.
මේ සම්බන්ධයෙන් විමර්ශනය කළ එරට ලැන්කැෂයර් පොලීසිය පැවසුවේ නීති උල්ලංඝනය කළ අග්‍රාමාත්‍යවරයාට කොන්දේසි සහිත දඩයක් නියම කළ බවයි.
‘සමාවෙන්මෙන. මෙය වැරැද්දක්. මම එය සම්පූර්ණයෙන්ම පිළිගන්නවා, ඒ වගේම ජනතාවගෙන් ඉල්ලා සිටිනවා ආසන පටි පළඳින ලෙස.’
එල්ල වූ චෝදනා සම්බන්ධයෙන් අග්‍රාමාත්‍යවරයා ජනතාවගෙන් සමාව ඉල්ලා ඇති අතර, අදාළ වීඩියෝව සිය ඉන්ස්ටග්‍රෑම් ගිණුමෙන් ඉවත් කර තිබේ.
විදෙස් වාර්තා පෙන්වා දෙන ආකාරයට එරට රථවාහන නීතිය අනුව, ආසන පටි නොපැළඳ, ධාවනයේ යෙදෙන ඕනෑම රියදුරෙකු හෝ මගියෙකු පවුම් 500 දක්වා දඩයකට යටත් වේ.
මීට පෙර ද කොවිඩ් 19 වසංගත තත්ත්වය යටතේ පනවා තිබූ ලොක්ඩවුන් නීති කඩකිරීම හේතුවෙන් ඔහු චෝදනාවට ලක් විය.