මැතිවරණ කොමිසමේ සේවය කරන නිලධාරීන් දෙදෙනෙකුට පොලිස් ආරක්ෂාව ලබාදීමට තීරණය කර තිබේ.
මැතිවරණ කොමිසමෙන් වහාම ඉවත් වන ලෙසත්, එසේ නොවුණහොත් ජීවිත තර්ජන ඇති විය හැකි බවත් පවසමින් මෙම නිලධාරීන් දෙදෙනාට දුරකතන ඇමතුම් මගින් තර්ජන එල්ල වී ඇතැයි එම නිලධාරීන් විසින් පොලිසියට පැමිණිලි කර තිබේ. මෙම නිලධාරීන් දෙදෙනා වන්නේ එස්. බී. දිවාරත්න සහ කේ. ජී. ජී. පතිරණ ය.
පසුගිය 18දා මෙම නිලධාරීන්ට අදාළ තර්ජන එල්ල වී ඇති අතර, එම දුරකතන ඇමතුම් සම්බන්ධයෙන් අපරාධ පරීක්ෂණ දෙපාර්තමේන්තුව මගින් විමර්ශන ආරම්භ කර ඇති බව පොලිස් මාධ්ය කොට්ඨාසය පවසයි.
මේ අතර ඊයේ (19) පාර්ලිමේන්තුවේ සම්මත වූ මැතිවරණ වියදම් නියාමන පනත නිසා පළාත් පාලන මැතිවරණය කල් දැමීමට සිදුවන බවට මාධ්ය වාර්තා පළ වී තිබිණි. ඒ සම්බන්ධයෙන් අදහස් දක්වමින් මැතිවරණ කොමිසමේ කොමසාරිස් ජනරාල් සමන් ශ්රී රත්නායක පැවසුවේ පනත සම්මත වීමෙන් මැතිවරණයට බලපෑමක් සිදුනොවන බවයි.
පනත සම්මතවීමත් සමග මැතිවරණ වියදම් නියාමනය සඳහා රෙගුලාසි පැනවිය යුතු ව ඇතැයි ද ඔහු සඳහන් කළේය.
මෙම පනත් කෙටුම්පතට පක්ෂ ව ඡන්ද 97ක් ලැබුණු අතර, විපක්ෂව ලැබී තිබුණේ ඡන්ද 36කි.