සංචාරක ශ්‍රී ලංකාව හා ඉන්දියාව අතර පළමු එක්දින තරගය ගුවාටි බාසපරා ක්‍රිකට් ක්‍රීඩාංගණයේදී ශ්‍රී ලංකා වේලාවෙන් අද පස්වරු 1.30ට ආරම්භ වීමට නියමිතය.
ශ්‍රී ලංකාව සහ ඉන්දියාව අතර අවසන් වරට 2017 වසරේ දී ඉන්දියාවේදී එක්දින තරගාවලියකට සහභාගී වූ අතර, එම තරගාවලිය 2-1ක් ලෙස ඉන්දියාව ජයග්‍රහණය කළේය.
එම තරගාවලියේ පළමු තරගය ධර්මශාලා හිදී පැවැති අතර එයින් ශ්‍රී ලංකාවට කඩුලු 7ක ජයක් හිමි කර ගැනීමට ශ්‍රී ලංකාව සමත්විය.
එහෙත් මොහාලී හි පැවති දෙවැනි එක්දින තරගය ලකුණු 141කින් හා විශාඛාපට්නම් හි පැවති තෙවැනි එක්දින තරගය කඩුලු 8කින් ඉන්දියාව ජයග්‍රහණය කළේය.
මේ වසර ඔක්තෝම්බර් මස ඉන්දියාවේදී පැවැත්වීමට නියමිත පන්දුවාර 50 ලෝක කුසලාන ක්‍රිකට් තරගාවලියට ශ්‍රී ලංකාව සුදුසුකම් ලබාගත හොත් එම තරගාවලියට පෙර ඉන්දීය තණතීරු මත ලබා ගන්නා මෙම තරග අත්දැකීම ඉතා වැදගත් වනු ඇතැයි ක්‍රිකට් විචාරකයින් පෙන්වාදෙයි.
ශ්‍රී ලංකාව හා ඉන්දියාව අතර දෙවැනි සහ අවසන් එක්දින තරගය ජනවාරි 12 සහ 15 දිනවල පිළිවෙළින් කල්කටා හා ත්‍රිවේන්ද්‍රම් හිදී පැවැත්වීමට නියමිතයි.
මේ අතර දෙරට අතර පැවැති විස්සයි 20 තරගාවලිය 2 – 1ක් ලෙස ජය ගැනීමට ඉන්දියාව සමත්විය.