සමාජ ක්‍රියාකාරී සේපාල් අමරසිංහට බන්ධනාගාරය තුළ දී ප්‍රහාරයක් එල්ල කර තිබේ.
මේ සම්බන්ධයෙන් thetime.lk කළ විමසීමකට පිළිතුරු දෙමින් බන්ධනාගාර කොමසාරිස් චන්දන ඒකනායක පැවසුවේ සිදුවීම පිළිබඳව පැමිණිල්ලක් ලැබී ඇති බවයි. ඒ සම්බන්ධයෙන් කඩිනම් විමර්ශනයක් පවත්වන බව ද ඔහු සඳහන් කළේය.
බෞද්ධ ආගමික ස්ථානයකට සමාජ මාධ්‍ය ඔස්සේ අපහාස කළ බවට චෝදනා එල්ල වීම නිසා සේපාල් අමරසිංහ අත්අඩංගුවට ගැනිණි.ඉන්පසු රක්ෂිත බන්ධනාගාරගත කරන ලද ඔහුට පෙරේදා (07) දහවල් පහරදීමක් සිදුකර ඇත.
මෙම පහරදීමට බන්ධනාගාර නිලධාරීන් සහ රැඳවියන් පිරිසක් සම්බන්ධ වී ඇති බවට චෝදනා එල්ල වේ.
පහර කෑම නිසා සේපාල් අමරසිංහ බන්ධනාගාර රෝහලට ඇතුළත් කෙරුණද, ඔහුගේ තත්ත්වය බරපතළ නොවන බැවින් ඊයේ (08) දහවල් නැවත රක්ෂිත බන්ධනාගාරයට රැගෙනවිත් තිබේ.
අදාළ සිදුවීම සම්බන්ධයෙන් ශ්‍රී ලංකා මානව හිමිකම් කොමිසමේ නියෝජිතයන් ද ඊයේ (08) බන්ධනාගාරයට පැමිණ ඔහුගෙන් ප්‍රකාශයක් ලබාගෙන ඇත.