අපරාධ පරීක්ෂණ දෙපාර්තමේන්තුවේ හිටපු අධ්යක්ෂ, විශ්රාමික ජ්යෙෂ්ඨ පොලිස් අධිකාරි ශානි අබේසේකරගේ මෝටර් රථයට පොලිස් කොස්තාපල්වරයෙකු අතින් වෙඩි වැදීමේ සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව විමර්ශනයක් ආරම්භ කර ඇත.
අබේසේකරගේ නිවසේ නතර කර තිබූ මෝටර් රථයට එහි ආරක්ෂාවට යොදවා සිටි පොලිස් කොස්තාපල්වරයෙකුගේ අතින් වෙඩි වැදී ඇති බවට මේ වනවිට කරුණු හෙළිදරව් වී තිබේ.
පසුගිය 17දා සිදු වූ මෙම සිදුවීම පිළිබඳව ශානි අබේසේකර විසින් බොරැල්ල පොලිසියට ද පැමිණිල්ලක් කර ඇත. සිද්ධිය වන අවස්ථාවේ ශානි අබේසේකර නිවසේ සිට නැත. සිය මෝටර් රථයට ඉන්ධන ලබාගැනීමට යෑමේදී එහි ඉන්ධන කාන්දුවක් ඇති බවට හඳුනාගෙන ඇති අබේසේකර, වාහනය අලුත්වැඩියා කරන ස්ථානයකට ගොස් පරීක්ෂා කිරීමේදී වාහනයේ ඉන්ධන ටැංකිය අසල වෙඩි සිදුරක් හඳුනාගෙන තිබේ.
මේ සම්බන්ධයෙන් කරන ලද ප්රශ්නකිරීම්වලදී අබේසේකරගේ ආරක්ෂාවට සිටින පොලිස් කොස්තාපල්වරයෙකු විසින් අත්වැරදීමකින් මෙය සිදු වූ බව පවසා ඇත. මූලික විමර්ශනවලින් පසු මෙහි ඉදිරි විමර්ශන අපරාධ පරීක්ෂණ දෙපාර්තමේන්තුව වෙත බාර දී තිබේ.
ශානි අබේසේකර යනු ඝාතන, අතුරුදන් කිරීම් සහ පැහැරගෙන යෑම් පිළිබඳ ආන්දෝලනාත්මක විමර්ශන රැසක් මෙහෙයවූ පොලිස් නිලධාරියෙකි. ගෝඨාභය රාජපක්ෂ ජනාධිපති ධුරයට පත්වීමෙන් පසු ඔහු ව අපරාධ පරීක්ෂණ දෙපාර්තමේන්තුවෙන් ඉවත් කොට, දකුණු පළාත බාර නියෝජ්ය පොලිස්පතිවරයාගේ පෞද්ගලික සහකාර ලෙස පත්කරන ලදි. ඉන්පසු ඔහුගෙන් දිගින්-දිගටම පළිගැනීම් සිදුවූ අතර, අසත්ය චෝදනා මත අත්අඩංගුවට ගැනීම් සහ වැටුප් අහිමි කිරීම් ද ඒ අතර විය.
මේ සම්බන්ධයෙන් ඔහු විසින් ශ්රේෂ්ඨාධිකරණය ඉදිරියේ මූලික අයිතිවාසිකම් පෙත්සමක් ද ගොනුකර තිබේ.