පෘතුගාල සුපිරි පාපන්දු ක්‍රීඩක ක්‍රිස්ටියානෝ රොනාල්ඩෝ වසර සඳහා සෞදි අරාබියේ අල් නසාර් ක්‍රීඩා සමාජය සමඟ ගිවිසුම් ගතවී තිබේ.
ඒ අනුව ඔහු වසර 2025 තෙක් එම ක්‍රීඩා සමාජය නියෝජනය කරන අතර ඔහුගේ ගිවිසුම් ගත වැටුප මෙතෙක් පාපන්දු ඉතිහාසයේ ක්‍රීඩකයකුට හිමිවූ වැඩිම වැටුප ලැබූ ලෙස වාර්තා අතරට එක්වෙයි.
මෙම නව ගිවිසුම අනුව රොනල්ඩෝට යුරෝ මිලියන 200ක වාර්ෂික වැටුපක් හිමිවේ. එය ඇමරිකන් ඩොලර් මිලියන 214.04ක් වන අතර
ශ්‍රී ලංකා මුදලින් රුපියල් කෝටි 775කට අධික වේ.
37 හැවිරිදි රොනාල්ඩෝ පවසන්නේ යුරෝපීය පාපන්දු ක්‍රීඩාවේදී තමන් අදහස් කළ සෑම ජයග්‍රහණයක් අත්කර ගැනීමට හැකිවුණු බවත් ආසියාවේදී තමන්ගේ අත්දැකීම් බෙදා ගැනීමට මෙය සුදුසු මොහොත යැයි හැඟෙන බවයි.
රෝනාල්ඩෝ මීට පෙර මැන්චෙස්ටර් යුනයිටඩ් ක්‍රීඩා සමාජය සඳහා එක්ව සිටි අතර පසුගිය කාල වකවානුව තුළ එම ක්‍රීඩා සමාජයේ පාලනාධිකාරිය දැඩි ලෙස විවේචනය කළේය.
වරක් ඔහු එහි කළමනාකරු සම්බන්ධයෙන් තමාට කිසිදු ගෞරවයක් නොමැති බව අවධාරණය කළේය.
“ක්‍රීඩා සමාජයේ අයිතිකරුවන්ට කණ්ඩායම ගැන හෝ වෘත්තීය ක්‍රීඩාව ගැන සැලකිල්ලක් නෑ,.. ඔවුන් අලෙවි කරන කණ්ඩායමක්. ඔවුන් මුදල් උපයන්නේ අලෙවි කිරීමෙන්, ඊළඟ අවුරුදු දෙක තුනේ දී ඔවුන්ට ලකුණු සටහනේ ඉහළින් ඉන්න අපහසු වෙයි”
යනුවෙන් රූපවාහිනි සාකච්ඡාවකට එක්වෙමින් රෝනාල්ඩෝ පවසා තිබිණි.
ක්‍රිස්ටියානෝ රොනාල්ඩෝ මැන්චෙස්ටර් යුනයිටඩ් වෙනුවෙන් තරග 346 කදී ගෝල 145ක් රැස්කර ඇත. එමෙන්ම ඔහු පසුගිය දෙසැම්බර් මස අවසන් වුණු ලෝක කුසලාන පාපන්දු තරගාවලියේ තරග 5ක් ක්‍රීඩා කරමින් එක් ගෝලයක් වාර්තා කළේය.