ලැබුණෝතින් පොඩි ඉඩක්
තාරකා අතරෙහි අපටත්
සඳ වටා අසුන් ගන්නට
සිනමා අහස් විමනෙ හි
සංගීත වෘන්දයකි එක් පසෙක
රැඟුම් වේදිකාවකි අනෙක් පස
මේ දැන් තව්තිසාවෙහි දොර ඇරන්
එතැනට පැමිණියාක් මෙනි ඔවුන්
වෙහෙසකර බවක් නොපෙනේ දිවියෙහි
දා බිදක් වත් නැත නළල් තලයෙහි
නිති සිනා මුහුණින් පසුවෙති
පෙර සැමි, බිරින්දෑවරුන් පවා හමුවෙති
“නාළිකා ප්‍රබන්ධයකි ඔය”
ඇතුළතින් ඔබේ හඬ නැග එයි
කොන් වනු බැරි නිසා තාරකා අබරෙහි
ආරාධනාවන් ලැබුන දා පටන්
ඔන්ලයින් ඇඳුම් තෝරන්න ඇති
සැලුන් කිහිපයකටත් යන්න ඇති
කාමරේ නැටුම් හුරු වෙන්න ඇති
කැඩපතින් පපුව නරඹන්න ඇති
පෙළක් විට ණය තුරුස් ගන්න ඇති
තිරය මත නව වසර උදාවෙහි
ඒ අයත් අපි වගෙම වෙන්න ඇති
චින්තක සමන්
(පිංතූරය තරංග ලක්නාත්)