මුදල් විශුද්ධිකරණය සහ අල්ලස් ලබා ගැනීම සම්බන්ධයෙන් වැරදිකරු කරමින් මාලදිවයිනේ හිටපු ජනාධිපති අබ්දුල්ලා යමීන්ට එරට අධිකරණය වසර 11 ක සිරදඬුවමක් නියම කර තිබේ.
රජයට අයත් දූපතක් බදු දීමට මුදල් ලබාගැනීම සම්බන්ධයෙන් යමීන් වරදකරු බව අධිකරණය තීන්දු කළ අතර මුදල් විශුද්ධිකරණය සම්බන්ධයෙන් වසර හතක සිරදඬුවමක් සහ අල්ලසක් ලබා ගැනීම සඳහා වසර හතරක සිර දඬුවමක් නියම කළේය.
සිරදඬුවමට අමතරව හිටපු ජනාධිපතිවරයාට ඩොලර් මිලියන 5ක දඩයක් ගෙවන ලෙසද නියම කෙරිණි.
යමීන් වරදකරු වූ පළමු අවස්ථාව මෙය නොවන අතර වසර 2019 දී වෙනත් නඩුවකදී, මුදල් විශුද්ධිකරණය සම්බන්ධයෙන් ඔහු වරදකරු වී වසර පහක සිර දඬුවමකටද යටත්විය.
එහෙත් වසර දෙකකට පසුව, ශ්‍රේෂ්ඨාධිකරණය අදාල තීන්දුව වෙනස් කරමින් , මූලික නඩු විභාගයේ සාක්ෂි පරස්පරතා අඩංගු බවත්, යමීන් පුද්ගලික වාසි තකා ඩොලර් මිලියනයක රාජ්‍ය මුදල් විශුද්ධිකරණය කර ඇති බවට ස්ථිරවම ඔප්පු නොකළ බවට තීරණය කර තිබිණි.
කෙසේවෙතත් යමීන්ගේ නිල කාලය තුළ ඔහුට දූෂණ චෝදනා, මාධ්‍යවලට මුවා වී දේශපාලන විරුද්ධවාදීන්ට හිංසා කිරීම වැනි චෝදනා රැසක් එල්ල විය.