පාපන්දු ලෝක කුසලාන තරඟාවලියේ අවසන් මහා තරඟය පැවැත්වෙන අවස්ථාවේදී ලෝක සාමය පිළිබඳ පණිවිඩයක් ප්‍රචාරය කිරීමට යුක්‍රේන ජනාධිපති වොලොදමීර් සෙලෙන්ස්කි කරන ලද ඉල්ලීම ලෝක කුසලානයේ සංවිධානය කරන FIFA මගින් ප්‍රතික්ෂේප කර තිබේ.
මෙහිදී යුක්‍රේන ජනාධිපතිවරයා නිල වශයෙන් ඉල්ලීමක් කර ඇත්තේ පාපන්දු ලෝක කුසලාන අවසන් මහා තරඟය අවස්ථාවේ වීඩියෝ පණිවිඩයක් මගින් ජනතාව ඇමතීමට ය. එහෙත් අන්තර්ජාතික පාපන්දු බලධරයා වන FIFA ආයතනය මගින් මෙම ඉල්ලීම ප්‍රතික්ෂේප කිරීම සම්බන්ධයෙන් සෙලෙන්ස්කි විමතිය පළකර ඇතිබව සී.එන්.එන් පුවත් සේවය වාර්තා කරයි.
කෙසේ වෙතත් තවදුරටත් මෙම අවස්ථාව ලබාගැනීම සම්බන්ධයෙන් සාකච්ඡා පැවැත්වෙමින් තිබෙන බවද වාර්තා වේ.
ලොව පුරා විවිධ විශේෂ අවස්ථා ගණනාකවදීම ජනතාව ආමන්ත්‍රණය කිරීම සඳහා යුක්‍රේන ජනාධිපතිවරයාට අවස්ථාව ලබාදීම සිදුකරන ලදි. ග්‍රැමී සම්මාන උළෙල, G20 සමුළුව, කැනස් සිනමා උළෙල වැනි අවස්ථා මෙන්ම ඊශ්‍රායල් පාර්ලිමේන්තුව සහ එක්සත් ජනපද සෙනෙට් සභිකයන් ආමන්ත්‍රණයටද සෙලෙන්ස්කිට අවස්ථාව හිමිවිය.
එවැනි වටපිටාවක ඔහුගේ ඉල්ලීම FIFA ප්‍රධානියා වන ඉතාලි ජාතික ගියානි ඉන්ෆැන්ටිනෝ විසින් තරයේ ප්‍රතික්ෂේප කිරීම සම්බන්ධයෙන් ලොව පුරා දැඩි අවධානය යොමුවී තිබේ. එසේම මින් පෙරද කටාර් රාජ්‍යය LGBTIQ ප්‍රජාවගේ හිමිකම් දැඩිලෙස උල්ලංඝනය කරද්දී පවා සත්කාරකත්වය ලබාදීම සඳහා මුරණ්ඩු තීරණවලට එළඹීම සම්බන්ධයෙන් දැඩිසේ විවේචනයට ලක්විය.
එසේම ඔහු දැඩිලෙස බටහිර විරෝධ ස්ථාවරයක් අනුගමනය කරන බවට චෝදනා එල්ල වේ. පාපන්දු ලෝක කුසලානය අතරතුර ක්‍රීඩකයන්ට දේදුනු වර්ණ සහිත අත් පළඳනා පැළඳීම, පාපන්දු ක්‍රීඩාකරන රටවල්වලට අදාල ධජයන් හැරෙන්නට වෙන ධජයන් හෝ පණිවිඩ ප්‍රදර්ශනය කිරීමද දැඩි ලෙස තහනම් කර තිබුණද පලස්තීන ධජයට රිසිසේ අවස්ථාව ලබාදීම බටහිර මාධ්‍ය දැඩි පිළිකුලෙන් යුතුව ඉස්මතු කර තිබේ. එසේ වූවද රුසියාව විසින් යුක්‍රේනය ආක්‍රමණය කිරීම හේතුකරගෙන රුසියානු කණ්ඩායමට ලෝක කුසලාන පාපන්දු තරඟාවලියේ ඉඩකඩ ලබා නොදීමට FIFA විසින් කටයුතු කරනු ලැබීය.