ආර්ජන්ටිනාව මෙවර පාපන්දු ලෝක කුසලානයේ අවසාන මහා තරඟයට සුදුසුකම් ලබා ගෙන ඉවරයි, කියා ගන්න බැරි මොකක්දෝ හැඟීමකින් මෙසී ඇතුළු ආර්ජන්ටිනාව ලෝක ශුරයන් වෙනවාට බොහෝ දෙනාගේ හිතේ කැමැත්තක් තියෙනවා. ආර්ජන්ටිනාව කියපු ගමන් මතක් වෙන්නෙ විප්ලවීය ඉතිහාසයේ සදා නොමැකෙන ආත්මීය සංකේතය වූ චේ ගුවේරා. චේ ඉපදුනේ, හැදී වැඩුනේ අධ්යාපනය ලැබුවේ ආර්ජන්ටිනාවෙදි. කියුබානු විප්ලවයෙන් පස්සෙ ලෝක ඉතිහාසයේ සදාතනික වීරයෙක් වෙච්ච චේ වගේ මනුස්සයෙක් ලෝකයට දායාද කරපු රටට ආදරයක්, කැමැත්තක් ඇති වන එක නවත්තන්නෙ කොහොමද. අනෙක් කෙනා තමයි ලෝකයක් වසඟ කල විසිවන සියවසේ හොඳම පාපන්දු ක්රීඩකයා වුණු මැරඩෝනා. 1986 දි ආජන්ටිනාවට පාපන්දු ලෝක කුසලානය අරන් දීපු මැරඩෝනා කියන්නෙ පාපන්දු ඉතිහාසයේ පුරාවෘත්තයක්. ආර්ජන්ටිනාව ලෝකයේ මුදුනටම අරන් ගියපු මේ දෙන්නම අද ජීවතුන් අතර නැති වුනත් ලෝකයේ කොයි මුල්ලක හිටියත් මිනිස්සු ලෝකයට දීල ගියපු දේවල් එක්ක ඒ ජයග්රහණයේ ආශිර්වාදය ගැට ගැහෙන හැටි හරිම ලස්සනයි.