ශ්‍රී ලංකා ගුවන් විදුලියේ පළමු නිත්‍ය ම සිංහල නිවේදකයා වීමේ වාසනාව ලැබුණේ ඩී. එම් කොළඹගේ මහතාටයි. ඔහු “කොළඹින් කතා කරමි” යැයි සඳහන් කරමින් ඇරඹුණු සිංහල ගුවන් විදුලි නිවේදක ගමනට පසු කලක බොහෝ ආධුනිකයන් එකතු වුණා. තමන් පළමු සිංහල නිවේදකයා වීම නිසා කිසිදිනක ආඩම්බරයට පත් නොවුණු එතුමා තමන්ගෙන් පසු පරපුරක් බිහි කිරීමට තමන්ගේ උපරිම දායකත්වය ලබා දුන්නා. මේ නිසා පසු කලක දී එතුමා ගුවන්විදුලි වැඩසටහන් නිෂ්පාදකයකු ලෙස පමණක් නොව ගුවන් විදුලි නිවේදකයන් පුහුණු කරන සම්පත් දායකයෙකු ලෙසත් මහත් වැඩ කොටසක් ඉටු කළා. ඔහුගේ කැපවීමේ ප්‍රතිඵල ඔහු ජීවතුන් අතර සිටියදීම ඔහුට ම දැක බලා ගැනීමට අවස්ථාව ලැබුණා.
- සිරි අයියා
අද මාධ්‍ය ක්ෂේත්‍රයේ පමණක් නොව විවිධ ක්ෂේත්‍ර වල දස්කම් පාන ජ්‍යෙෂ්ඨයන් බොහෝ දෙනෙකුගේ දක්ෂතා නිරූපණය කිරීමට මුල් අඩිතාලම ලැබුනේ ළමා පිටිය තුළින්. මේ ළමා පිටියේ ප්‍රධානියා වූයේ ළමයින්ගේ ආදරණීය සිරි අයියායි. නාලන්දා විද්‍යාලයේ ගුරුවරයකු ලෙස ජීවිතය ආරම්භ කළ එතුමා පසුකලෙක නීතිඥවරයෙකු ලෙසත් රාජතාන්ත්‍රිකයෙකු ලෙසත් කටයුතු කළා. එතුමා සැබෑ ජීවිතයේ භාවිතා කළ නම යූ. ඒ. එස් පෙරේරා යන්නයි. කවියෙකු වූ එතුමා රචනා කළ “සුරතල් නංගියේ අපෙ අම්මා” ගීතය අද දක්වාම දරුවන් අතර පමණක් නොව වැඩිහිටියන් අතර ද එක සේ ජනප්‍රියයි.
- අමරබන්දු රූපසිංහ
අමරබන්දු රූපසිංහ කියන නම අපේ පරම්පරාව අතර ජනප්‍රියත්වයට පත් වුණේ ජනාධිපති මෛත්‍රීපාල සිරිසේන මහතා විසින් ප්‍රකාශ කළ විහිළු කතාවක් හේතුවෙන්. ඒ කතාවට අනුව අමරබන්දු රූපසිංහ මහතා වෙරි මතින් සිරිමාවෝ බණ්ඩාරනායක මැතිනියගේ සාරියට වමනය කොට තිබෙනවා. ඒ කතාව කොහොම වුණත් පැරැන්නන් කියන විදිහට විදිහට අමරබන්දු රූපසිංහ මහතා මනා පෞරුෂයකින් යුතු ව ප්‍රවෘත්ති ඉදිරිපත් කළ දක්ෂ නිවේදකයෙක්. නමුත් යාපනයට යන අතරතුරදී ඔහු ගමන්ගත් හෙලිකොප්ටරයට එල්ල වූ එල්.ටී.ටී.ඊ ප්‍රහාරයක් නිසා අකාලයේ ජීවිතයෙන් සමු ගැනීමට අමරබන්දු රූපසිංහ මහතාට සිදු වුණා.
- ආරියදාස පීරිස්
ශ්‍රී ලංකා ගුවන් විදුලියේ වෙළඳ සේවයේ පළමු නිත්‍ය සිංහල නිවේදකයා විදිහට සැලකෙන්නේ ආරියදාස පීරිස් මහතායි. තමන්ගේ හඬ පෞරුෂයෙන් පමණක් නොව නිර්මාණශීලීත්වයෙන් වෙළඳ සේවය වෙනත් මගකට ගෙන යෑමට ඔහු සමත් වුණා. විශේෂයෙන් ‘ආධුනික පැය’ වැනි වැඩසටහන් හරහා මෙතෙක් ගුවන් විදුලියේ දොර විවෘතව නොතිබුණු ගායක ගායිකාවන්ට නව දොරටුවක් විවෘත කිරීමට ඔහු සමත් වුණා. ඒ හරහා වෙළඳ සේවයට වාර්තාගත ආදායමක් උපයා දීමටත් දීමටත් ඔහුට හැකියාව ලැබුණා. ඒ වගේම තම දියණිය වන චරිතා ප්‍රියදර්ශනී පීරිස් වත් ගුවන් විදුලියට හඳුන්වා දීමට ඔහු කටයුතු කළා.
- කරුණාරත්න අබේසේකර
මහින්ද රාජපක්ෂ වරක් අපූරු ප්‍රකාශයක් සිදු කළා. ඒ තමයි එස්. ඩබ්ලිව්. ආර්. ඩී බණ්ඩාරනායක මහතා මිය යන විට එම රජය දැඩි ලෙස ජනතා අප්‍රසාදයට පත්ව තිබුණත් බණ්ඩාරනායක මහතාගේ මරණය ගුවන් විදුලිය මගින් විකාශනය කරද්දී කරුණාරත්න අබේසේකර මහතා සිදුකළ වැඩසටහන් කථනය නිසා බණ්ඩාරනායක මහතා කෙරෙහි තිබුණු විරෝධය සමනයට පත්වීම සිදුවුණා කියලා. කරුණාරත්න අබේසේකරගේ නිවේදන හැකියාව ගැන මේක හොඳම උදාහරණයක්. කරුණාරත්න අබේසේකර මහත්මයාගේ ගී පද රචනාත් එතුමාගේ හඬ වගේම සුමිහිරියි කියන දේත් ආපහු මතක් කරන්න අවශ්‍ය නැහැයි කියල අපි හිතනවා.
- ප්‍රේමකීර්ති ද අල්විස්
කරුණාරත්න අබේසේකර මහත්මයා වගේම ප්‍රේමකීර්ති ද අල්විස් මහත්මයාත් ගී පද රචකයෙක් වගේම සුපිරි ගණයේ නිවේදකයෙක්. මේ නිසාම යම් දිනක ප්‍රේමදාස රජයෙන් ඔහුට ගුවන් විදුලි සංස්ථාවේ සභාපති ධූරය ලැබෙනු ඇතැයි කියා කතාවක් තිබුණා කියලත් කියවෙනවා. ඇතැම් පාර්ශ්ව කියන විදිහට ඔහුගේ මරණයට හේතු වෙන්නෙත් මේ කතාව. කොහොම වුණත් බොහෝ මුල්කාලීන ගුවන් විදුලි නිවේදකයන්ට නොලැබුණු භාග්‍යයක් ප්‍රේමකීර්ති ද අල්විස් මහත්තයාට ලැබුණා. ඒ තමයි ඔහුට රූපවාහිනී සංස්ථාව ඇරඹීමත් සමඟ රූපවාහිනී නිවේදකයකු වීමටත් අවස්ථාව ලැබීම.
- නිමල් ලක්ෂපතිආරච්චි
ගුවන්විදුලි සංස්ථා මහ ගෙදර ඉඳන් ලංකාවේ පළවෙනි පෞද්ගලික ගුවන්විදුලි නාලිකාව අරඹන්න ප්‍රමුඛත්වය ගත්ත නිමල් ලක්ෂපතිආරච්චි ගැඹුරු හඬ පෞරුෂයක් තිබුණු දක්ෂ නිවේදකයෙක්. නමුත් ජීවිතයේ මැදි වයසේ ඉඳන් අවසාන මොහොත දක්වාම ඔහු සීමා වුණේ ගුවන් විදුලි සහ රූපවාහිනී සේවා පරිපාලනයට. නමුත් අතරින් පතර ඔහු වැඩසටහන් මෙහෙයවීමටත් සම්බන්ධ වුණා. ජීවිතයේ අවසාන කාලයේ දී තමන් නිර්මාණය කළ හෝ ඇතැම් වැඩසටහන් සංස්කෘතියට නොගැලපෙන බවත්, ඒ ගැන තමන් අවංකවම කණගාටු වන බවත් ඔහු ප්‍රකාශ කළා.
(lifie blogger වාර්තා තුලින් උපුටා පල කරනලදී)