වසීම් තාජුඩීන් යම් කිසි අසාධාරණයකට ලක්වී තිබේ නම් සාධාරණ හා අපක්ෂපාතී පරීක්ෂණයක් සිදුකරන ලෙස පාර්ලිමේන්තු මන්ත්‍රී නාමල් රාජපක්ෂ පවසයි.
එසේ නොකළහොත් එය ඔහුගේ ආත්මයට සිදුකරන අසාධාරණයක් බව නාමල් රාජපක්ෂ සඳහන් කර සිටියි.
අද (01) පැවති ප්‍රවෘත්ති සාකච්ඡාවකදී මාධ්‍යවේදීන් නැගූ ප්‍රශ්නවලට පිළිතුරු දෙමින් ඔහු මේ බව ප්‍රකාශ කළේය.
එහිදී අදහස් දක්වමින් මන්ත්‍රීවරයා පැවසුවේ වත්මන් ආණ්ඩුව මෙන්ම ඊට පෙර පැවති යහපාලන ආණ්ඩුව ද වසීම් තාජුඩීන්ගේ ඝාතනය සම්බන්ධයෙන් රාජපක්ෂ පවුල ඉලක්ක කර ගනිමින් නොයෙක් අභූත චෝදනා ගොඩනැගූ බවත්, මෙම නඩුව සම්බන්ධයෙන් නාරාහේන්පිට පොලිස් ස්ථානාධිපතිවරයාව බලහත්කාරයෙන් බොරු සාක්ෂි ලබාගැනීමට එදා නිලධාරීන් කටයුතු කළ බවයි.
එසේ කටයුතු කළ එම නිලධාරීන් ම අද ආණ්ඩුවේ ඉහළ තනතුරුවල සිටින බව ඔහු කියා සිටියේය.
තවදුරටත් අදහස් දක්වමින් මන්ත්‍රීවරයා පැවසුවේ අපරාධ පරීක්ෂණ දෙපාර්තමේන්තුව නිරන්තරයෙන් බොරු සාක්ෂි නිර්මාණය කරමින් ආණ්ඩුව සතුටු කිරීමට උත්සාහ කරන බවයි.