2024 සැප්තැම්බර් 27 වැනිදා සිට 2025 අගෝස්තු 12 වැනිදා දක්වා වැඩ බලන පොලිස්පතිවරයා ලෙස කටයුතු කළ ජ්‍යෙෂ්ඨ නියෝජ්‍ය පොලිස්පති ප්‍රියන්ත වීරසූරිය පොලිස් දෙපාර්තමේන්තුවේ 37වැනි පොලිස්පතිවරයා ලෙස අද (12) ජනාධිපති අනුර කුමාර දිසානායක විසින් පත්කිරීමට නියමිත ය.
ජනාධිපතිවරයා විසින් ජ්‍යෙෂ්ඨ නියෝජ්‍ය පොලිස්පතිවරයාගේ නම ආණ්ඩුක්‍රම ව්‍යවස්ථා සභාවේ අනුමැතියට යොමුකර තිබිණි. කතානායකවරයාගේ ප්‍රධානත්වයෙන් එම සභාව අද පෙරවරුවේ රැස්වීමෙන් පසු ඊට අනුමැතිය ලබාදුන්නේය.
ප්‍රියන්ත වීරසූරිය 1988 වර්ෂයේ පොලිස් අභ්‍යාස විද්‍යාලයෙන් පුහුණුව ලබා, 1988 වසරේ මැයි 20 වැනිදා පොලිස් කොස්තාපල්වරයකු ලෙස පොලිස් සේවයට එක් විය. 1992 වර්ෂය වන තුරු පොලිස් විශේෂ කාර්ය බලකායේ සහ පොලිස් රථවාහන අංශයේ සේවය කළ වීරසූරිය මහතා, 1992 අගෝස්තු 20 වැනිදා සිට උප පොලිස් පරීක්ෂක ධුරයට උසස්වීම් ලැබුවේය. 1993 වර්ෂයේ සිට 1998 වර්ෂය දක්වා ඔහු කොළඹ විශ්වවිද්‍යාලයෙන් නීති උපාධිය හැදෑරීය.
2007 වර්ෂයේදී පොලිස් අධිකාරි ධුරයටත්, 2012 වර්ෂයේදී ජ්‍යෙෂ්ඨ පොලිස් අධිකාරි ධුරයටත් පත්වූ ඔහු, 2016 වර්ෂයේදී නියෝජ්‍ය පොලිස්පති ධුරයට පත්විය. පොලිස් නීති කොට්ඨාසයේ සහ සැපයුම් කොට්ඨාසයේත්, එක්සත් ජාතීන්ගේ සාමසාධක සේවයේ නැගෙනහිර ටිමෝරයේ සහ හයිටි රාජ්‍යයේත් ඔහු සේවය කර ඇත.
දේශබන්දු තෙන්නකෝන්ට පොලිස්පති ධුරයේ රාජකාරි කිරීම වළක්වාලමින් ශ්‍රේෂ්ඨාධිකරණයෙන් තහනම් නියෝගයක් ලබාදෙන ලද්දේ 2024 ජූලි 24 වැනිදා ය. එම නියෝගය ලබාදෙන ලද්දේ මූලික අයිතිවාසිකම් පෙත්සම් 09ක් සලකාබැලීමෙන් අනතුරුව ය. ඉන්පසු මාස 03ක කාලයක් හිස්ව තිබූ පොලිස්පති ධුරයට, වැඩ බලන පොලිස්පතිවරයා ලෙස එවකට ජ්‍යෙෂ්ඨ නියෝජ්‍ය පොලිස්පති ප්‍රියන්ත වීරසූරිය ජනාධිපති අනුර කුමාර දිසානායක විසින් පත්කරන ලදි. ඒ, 2024 සැප්තැම්බර් 27 වැනිදා ය.