‘ප්ලේටෝ කියන දාර්ශනිකයා මෙන්න මෙහෙම දෙයක් ලියලා තියෙනවා. ඔබේ කැඩුණු සපත්තුව සාදාගැනීමට ඔබ සොයන්නේ දක්ෂතම සපත්තු සාදන්නා. අසනීප වූ විට බෙහෙත් ගැනීමට ඔබ සොයන්නේ දක්ෂතම වෛද්‍යවරයා. එහෙත් සියලු කලාවන් අතරින් උසස් ම කලාව වන පාලන කලාව සඳහා ඔබ තෝරාගන්නේ අදක්ෂ කපටි රැළක්. මිත්‍රවරුනි, ඒ වැදගත් උපදෙස් අනුගමනය කරමින් යෝජනා කරනවා රට ගෙඩනගන දක්ෂ, හපන්කම් තියෙන කණ්ඩායමක් අපි මේ රටට පත්කරගමු කියලා.’
ඊයේ (11) බොරැල්ල, කැම්බල් පිටියේ පැවති සමගි ජන බලවේගයේ වාර්ෂික සමුළුව අමතමින් විපක්ෂ නායක සජිත් ප්‍රේමදාස එසේ පැවසීය. එහිදී වැඩිදුරටත් අදහස දක්වමින් විපක්ෂ නායකවරයා සඳහන් කළේ පොදුජන අරගලය සමගි ජන බලවේගය අතට ගනිමින් නුදුරු අනාගතයේදී රට ගොඩනගන විප්ලවය ක්‍රියාත්මක කරන බවයි.
එහිදී අදහස් දක්වමින් සජිත් ප්‍රේමදාස මෙසේ ද සඳහන් කළේය.
‘පොදුජන අරගලය නිසා සිරගත වූ විශාල ප්‍රමාණයක් තරණ-තරුණියන් සිටිනවා. අපි ඒ අය වෙනුවෙන් පෙනීසිටිනවා විතරක් නෙමෙයි, ජනතාවගේ දුක් කඳුළු මත, පීඩනය මත නිර්මාණය වූ ඒ මහා ජන අරගලය අතට අරගෙන නුදුරු අනාගතයේදී මේ රට ගොඩගන්න දැවන්ත විප්ලවය ක්‍රියාත්මක කරන්න අපි කටයුතු කරනවා.
සජිත් ප්‍රේමදාස සමගි ජන බලවේගයේ නායකයා ලෙස මෙහිදී යළිත් ඒකමතිකව තොරගැනුණු අතර, සමගි ජන බලවේගයේ සභාපති ලෙස සරත් ෆොන්සේකා පත් විය. රංජිත් මද්දුමබණ්ඩාර පක්ෂ ලේකම්වරයා ලෙසත්, හර්ෂ ද සිල්වා පක්ෂ භාණ්ඩාගාරික ලෙසත් පත්කෙරිණි. එහි ජාතික සංවිධායක ලෙස තිස්ස අත්තනායක පත්විය.