බෞද්ධ භික්ෂුණීන්ට සිල් මාතා වෙනුවට භික්ෂුණී යන පිළිගැනීම ලබා දී ජාතික හැඳුනුම්පත් ලබා දෙන ලෙස පුද්ගලයන් ලියාපදිංචි කිරීමේ දෙපාර්තමේන්තුවට ශ්රේෂ්ඨාධිකරණය නියෝග කර තිබේ.
මෙතෙක් භික්ෂුණීන් වහන්සේලාට නිල නීතිමය පිළිගැනීමක් ලැබී නොතිබුණු අතර, භික්ෂුණීන් වහන්සේලාට එවැනි පිළිගැනීමක් ලබාගැනීම සඳහා දීර්ඝ කාලයක් ඉල්ලීම් කරමින් තිබිණි. අගවිනිසුරු මුර්දු ප්රනාන්දු සහ විනිසුරු ගාමිණී අමරසේකර එකඟත්වය ලබාදුන් බහුතර තීන්දුවක් ලෙස එම තීන්දුව ලබා දී ඇත. භික්ෂුණීන් වහන්සේට හැඳුනුම්පත් ලබානොදීමෙන් ආණ්ඩුක්රම ව්යවස්ථාව 12 (1) වගන්තිය උල්ලංඝනය කර ඇති බව එහිදී තීන්දු කර තිබේ.
වැලිමඩ ධම්මදින්නා මෙහෙණින් වහන්සේ සහ සියම් නිකායේ රංගිරි දඹුලු පාර්ශ්වයේ මහ නායක හිමියන් විසින් මෙම පෙත්සම ඉදිරිපත් කර ඇත. මෙහෙණින් වහන්සේ සිය පෙත්සමේ සඳහන් කර ඇත්තේ දඹුල්ල රන්ගිරි රජමහා විහාර පාර්ශ්වයේ මහ නායක හිමියන්ගෙන් තහවුරු කිරීමක් ලබානොගෙනම පෙත්සම්කාරියගේ ජාතික හැඳුනුම්පතට භික්ෂුණී යන නාමය ඇතුළත් කිරීම ප්රතික්ෂේප කළ බවයි.
එමෙන්ම මෙය පැහැදිලි ලෙස වෙනස් කොට සැලකීමක් බව විනිසුරු අමරසේකර සිය තීන්දුවේ සඳහන් කර ඇත. ඇය පුරුෂ භික්ෂුවක වූයේ නම් මෙසේ හැඳුනුම්පත ලබාගැනීම අසීරු නොවන බව එම තීන්දුවෙහි සඳහන් කර තිබිණි.
කෙසේවෙතත්, උක්ත බහුතර තීන්දුවට පටහැනි තීන්දුවක් ලබා දෙමින් විනිසුරු මහින්ද සමයවර්ධන පෙත්සම නිෂ්ප්රභ කරමින් තීන්දුව ලබා දී තිබේ. ඔහු සිය තීන්දුවේ සඳහන් කළේ අදාළ ආගමික බලධාරීන්ගේ විෂයපථයට අයත් ආගමික කාරණාවලට ශ්රේෂ්ඨාධිකරණය මැදිහත් වීමෙන් වැළකිය යුතු බවයි.